Ministri i Infrastrukturës, Arban Abrashi, ka emëruar si sekretar të kësaj ministrie Zymer Abdullahun në vend të Izedin Bytyqit, i cili ushtronte këtë detyrë deri sot, raporton Front Online.

Me të marrë detyrën, sekretari i ri i emëruar, Zymer Abdullahu, ka nisur shkarkimet.

Në bazë të vendimit që posedon Front Online, ai sot ka shkarkuar nga detyra shefin e Prokurimit, Nexhat Krasniqin.

Në arsyetimin e vendimit për shkarkim, ndër të tjera thuhet se Nexhat Krasniqi në bazë të vendimeve të mëhershme për kthim në punë, ka rifilluar punën në kundërshtim me Vendimin e Gjykatës Supreme të Republikës së Kosovës CML.nr 12/2029 i datës 18.11.2019.

Përndryshe, sekretari i ri Zymer Abdullahu ka qenë bashkëpunëtor i afërt i ish-sekretarit Betim Reçica, ndaj të cilit është ngritur aktakuzë nga prokuroria./Front Online/