Për 19 ditë, nga 24 Dhjetori 2021 e deri më 11 Janar 2022, Korporata Energjetike e Kosovës shpenzoi 16.5 milionë nga 20 milionë eurot e subvencionit fillestar të Qeverisë, për importin e energjisë elektrike për dimrin e kaluar.
Në bazë të dokumenteve ekskluzive të siguruara nga ATV-ja, shihet se gjatë kësaj periudhe, përmes dhjetëra ankandeve, KEK-u nënshkroi 108 kontrata me shtatë kompani të ndryshme, sipas metodave: një ditë para dhe brenda ditës.
Çmimi më i ulët i paguar për një megavat orë ishte 105.5 euro, më 2 Janar, në kontratën me kompaninë bullgare Energy Supply.
Ndërsa, çmimi i lartë i paguar për një megavat orë ishte 359 euro, më 10 Janar, në kontratën me kompaninë sllovene GEN-i.
Nga totali prej 16 milionë e 552 mijë eurosh, nëpërmjet ankandeve, 4 milionë e 533 mijë euro shkuan te kompania NOA Energy Trade, në Maqedoni të Veriut dhe në Shqipëri, me të cilën KEK-u nënshkroi 19 kontrata.
Kompania GEN-I, me zyrat në Slloveni dhe në Maqedoni të Veriut, fitoi numrin më të madh të kontratave në ankandet e KEK-ut, 30 sish, me vlerë të përgjithshme 4 milionë e 237 mijë euro.
Enertrade nga Shqipëria fitoi 23 kontrata, në vlerë të përgjithshme 3 milionë e 809 mijë euro.
Me një kontratë më pak, Holding Slovenske Elektrarne i shiti KEK-ut energji elektrike në vlerë të përgjithshme 2 milionë e 421 mijë euro.
Kompania Daneze, Danske Comodities, nënshkroi pesë (5) kontrata me KEK-un me vlerë të përgjithshme më shumë se 917 mijë euro.
Pak më shumë se 630 mijë euro është vlera e tetë (8) kontratave për blerje të energjisë nga kompania ReNRGY nga Shqipëria.
Ndërsa, kontrata e 2 Janarit, në vlerë të përgjithshme 2 mijë e 532 euro ishte e vetmja me kompaninë bullgare, Energy Supply.
Me rekomandim të Komitetit Teknik Emergjent, 11 Janar 2022, KEK-u bëri marrëveshje me Kompaninë Kosovare për Furnizim me Energji – KESCO, përmes së cilës autorizoi kompaninë private të tregtojë me mjetet nga subvencioni i Qeverisë.
Në ditët në vijim, ATV-ja do të publikojë detaje tjera lidhur me importin e energjisë elektrike me subvencionin e Qeverisë, përfshirë periudhën kur tregtimi u bë nga KESCO-ja.
