Partitë politike të martën zyrtarisht e hapën fushatën për zgjedhjet e jashtëzakonshme të 14 shkurtit, shkruan Front Online.

Edhe në këto zgjedhje, si rëndomë, partitë po premtojnë ndryshime në arsim, ekonomi, shëndetësi dhe fusha të tjera.

Premtimet, nga analistët politik, po shihen të parealizueshme dhe kopje e programeve të partive evropiane.

Njohësi i çështjeve politike, Arton Demhasaj për Front Online ka  thënë se subjektet politike po premtojnë shumëçka por që janë vështirë të realizueshme.

“Në fushatë partitë politike premtojnë shumëçka që në esencë mundësia për të i zbatuar ato është jo e  madhe”, ka thënë Demhasaj.

Sipas Demhasaj, programi i Lëvizjes Vetëvendosje është më i kapshëm dhe më i realizueshëm.

“Sa i përket kandidatëve për kryeministër, vërehet që është program më i kapshëm dhe më i realizueshëm që zoti Kurti e ka publikuar,  janë disa elemente kogja të mira që u përmenden”, është shprehur ai.

Kurse Nexhmedin Spahiu thotë se programet e partive nuk i lexon askush madje as vet liderët e partive.

“Programet e partive politike nuk i lexon askush, nuk i lexon as lideri i asnjë partie. Ato programet vetëm janë send formal të cilën e dimë, që kur ka qenë OSBE-ja paslufte, ka thënë se partitë duhet të kenë program dhe tash shpenzojnë para me i shkru disa shkronja në letër të cilat zakonisht janë plagjiaturë, kopjimi prej partive tjera prej partive të ndryshme në Evropë, të adaptuara nga ndonjë aktivist i partisë në fjalë”, ka thënë Spahiu.

Sipas Spahiut as votuesit në Kosovës nuk votojnë duke u bazuar në programe, por në bazë të liderit të partisë.

“Nuk merren zgjedhësit në Kosovë me programe. Zgjedhësit në Kosovë e shikojnë ‘qehren’ e liderit dhe votojnë në bazë të ‘qehres’ së liderit”, ka thënë Spahiu.

Fushata e filluar me 3 shkrut do të zgjasë deri më 13 shkurt, ku pas heshtjes zgjedhore 24 orëshe, qytetarët më 14 shkurt do t’u drejtohen kutive të votimit.