Rryma e shpenzuar nga serbët në veri në vitin 2022, i ka kushtuar buxhetit të Kosovës plotë 63.2 milionë euro.

Këtë e kanë bërë të ditur për Front Online nga Operatori i Sistemit, Transmisionit dhe Tregut të Energjisë Elektirke në Kosovë (KOSTT).

Sipas saj, në mungesë të buxhetit, për mbulimin e humbjeve nga energjia e konsumuar në pjesën veriore të Kosovës energjia elektrike tërhiqet në formë të devijimeve nga Sistemi Elektroenergjetik i Evropës Kontinentale.

“Obligimet financiare të KOSTT për humbjet e shkaktuara në pjesën veriore të vendit për muajt janar- dhjetor 2022 ishin rreth €63.2 milion. Në mungesë të buxhetit për mbulimin e humbjeve nga energjia elektrike e shfrytëzuar por jo e paguar në pjesën veriore të Kosovës, për mbulimin e këtij konsumi energjia elektrike tërhiqet në formë të devijimeve nga Sistemi Elektroenergjetik i Evropës Kontinentale”, thuhet në përgjigjen e KOSTT.

Serbët vazhdojnë të mos e paguajnë rrymën në veri, vetëm në janar shpenzuan afër 4.5 milionë euro

Ndërsa, brenda muajit të parë të vitit 2023, sipas KOSTT-it, humbjet nga mospagesa e rrymës në atë pjesë të Republikës së Kosovës janë 4.5 milionë euro

“Vlera e humbjeve nga energjia e konsumuar dhe jo e paguar në pjesën veriore të Kosovës vetëm për periudhën janar 2023, llogaritet të jetë afër €4.5milion”, thonë nga KOSTT për Front Online.

Front Online ka pyetur sa i përket shtrenjtimit të tarifave të energjisë, në përgjigjen e tyre thuhet se do të bëhet në bashkëpunim me Zyrën e Rregullatorit për Energji.

“Për të përmbushur përgjegjësitë për krijimin e kushteve për sigurinë e furnizimit me energji elektrike dhe operimin e sigurt dhe të besueshëm të sistemit të transmetimit përveç tjerash, KOSTT sikurse të gjitha kompanitë e tjera të rregulluara të sektorit të energjisë siguron operimin nga të hyrat e lejuara maksimale sipas aprovimit nga Zyra e Rregullatorit të Energjisë, prandaj është i domosdoshëm reflektimi i të gjitha kostove në të hyrat e lejuara. Kostot e operimit të sistemit të transmetimit e përbejnë vetëm një pjesë të vogël të kostos totale e cila bartet tek konsumatori”, thuhet në përgjigjen e KOSTT për Front Online.

Kosova dhe Serbia kanë arritur një dakordim për zbatimin për marrëveshjen e energjisë të vitit 2013.

Ky dakordim parashihte një kalendar 100 ditor, deri tek faturimi i konsumatorëve në veri.

Por edhe pas kanë kaluar tash e sa muaj, faturimi nuk ka filluar, sepse nuk janë zbatuar shumë nga pikat e këtij udhërrëfyesi.

Qytetarët e komunave, Mitrovicë e Veriut, Leposaviq, Zveçan dhe Zubin Potok nuk paguajnë për rrymën e shpenzuar tash e dy dekada.

Që nga viti 2017 e deri më sot, konsumi i energjisë elektrike në komunat në veri të Kosovës është paguar nga Qeveria e Kosovës dhe nga KOSTT-i./Front Online/