Zyrtari i lëvizjes Vetëvendosje Andan Rrustemi ka komentuar aktgjykimet e Kushtetutës së Kosovës për të cilat thotë se në rast se ndodh mocioni i mosbesimit, sipas tij duke ju referuar neneve kushtetuese, vendi duhet të shkoj në zgjedhje, shkruan Front Online.

Rrustemi ka deklaruar se është përmbysje e rendit kushtetues nëse pas mocionit për rrëzimin e Qeverisë, formohet Qeveri kundër vullnetit të votuesve.

Në llogarinë e tij në Facebook ndër tjera ai ka shkruar se një qeveri e re nuk do të lejohet nga qytetarët e Kosovës.

“Pas kësaj nuk do të kishte kuptim Kushtetuta, nuk do të kishin vlerë zgjedhjet dhe nuk do të kishte përmbajtje demokracia. Prandaj nuk mund të ndodhë, nuk duhet dhe nuk do të lejohet nga qytetarët”, ka shkruari Rrustemi.

Postimi i plotë i Rrustemit:

Kjo Kushtetutë dhe aktgjykimi i GJK-së kanë përcaktuar kushtet dhe proceduren e zgjedhjes së Qeverisë mbi kriterin mbizotërues dhe të pakapërcyeshëm të rezultatit të zgjedhjeve. Kurdo kur ky kriter bije përmes mocionit ose pamundësohet, procesi duhet të rikthehet tek qytetarët, pra te zgjedhjet.

Çfarëdo tendence për të ndryshuar rregullat e lojës në mes e në mënyrë antikushtetuese, duke krijuar qeveri kundër vullnetit të votuesve e përkundër vullnetit të shumicës, pa partinë fituese e përkundër saj, është përmbysje e rendit kushtetues, rrënim i vlerave e parimeve demokratike dhe përpjekje për të përvetësuar autorizime që nuk u takojnë e absolitizuar pushtetin. Një gjë e tillë është e papranueshme dhe do të kishte pasoja të parikuperueshme për Kosovën, demokracinë dhe shtetin e së drejtës, por para së gjithash për ata që duan ta kontrabandojnë atë.

Pas kësaj nuk do të kishte kuptim Kushtetuta, nuk do të kishin vlerë zgjedhjet dhe nuk do të kishte përmbajtje demokracia. Prandaj nuk mund të ndodhë, nuk duhet dhe nuk do të lejohet nga qytetarët.