Policia e Kosovës në raportin 24 orësh, ka bërë të ditur se dje janë arrestuar dy të dyshuar, punëtorë të KEDS-it, të cilët kishin sulmuar një person. Derisa viktima ka pranuar edhe tretman mjekësor.
“Rr. Dëshmorët e Kombit, Deçan 31.08.2020,11:58. Janë arrestuar dy të dyshuar meshkuj kosovarë punëtor të KEDS-it të cilët pas një mosmarrëveshje rreth parkimit të veturës së tyre të cilën e kishin parkuar në vende punishte e kishin sulmuar viktimën mashkull kosovar i cili në atë vende kishte qenë duke punuar në rrugë. Viktima si pasoj e sulmit ka pranuar tretman mjekësor, kurse të dyshuarit me vendim të prokurorit janë dërguar në mbajtje”, ka bërë të ditur Policia.
Por, Federata Sindikale e Pavarur Elektrokosova, përmes një postimi në FB thonë se punëtorët e tyre janë rrahur. Madje, kërkojnë që organet e rendit të mirren me rastin dhe sulmuesit të vihen para drejtësisë.
“Dënojmë sulmin fizik ndaj dy punëtorëve tanë në vendin e tyre të punës në distriktin e Pejës. Ne si sindikatë ftojmë organet e rendit të mirren me rastin si dhe sulmuesit të vihen para drejtësisë, sulmi në vendet e tyre të punës është akt i ligë dhe qyqar. Njëkohësisht kërkojmë nga menaxhmenti i KEDS-KESCO, që punëtorëve tanë të ju ofrohet siguri më e madhe si dhe të mirren parasysh vështirësitë e tyre në vendet e punës”, kanë thënë ata.
