Ministri i Punës dhe Mirëqenies Sociale, Skender Reçica, ka pritur sot në takim përfaqësuesit e Lidhjes së Pensionistëve të Kosovës, të prirë nga Shaban Kajtazi.
Në këtë takim u diskutua në lidhur me angazhimet e ministrisë për jetësimin e sa më të shpejt të kërkesave të pensionistëve, të cilat kanë të bëjnë edhe me njohjen e stazhit të punës për punonjësit e larguar me dhunë nga puna gjatë viteve të 90-të, njofton Klan Kosova.
”Dëgjova nga afër shqetësimet e arsyeshme të tyre rreth vonesave të paarsyeshme nga institucionet tona përkatëse, si dhe mungesës së vullnetit politik për miratimin e nismave ligjore që e përmirësojnë dukshëm mirëqenien e pensionistëve tanë”, shkruan Reçica në Facebook.
”U shpreha vendosmërinë dhe përkushtimin tim për miratimin sa më parë të të gjitha akteve ligjore të cilat ndikojnë në mirëqenien e të gjithë qytetarëve, veçmas plotësim-ndryshimin e Ligjit për Skemat Pensionale të Shtetit, që i hap rrugë njohjes së stazhit të punës për punonjësit e larguar me dhunë gjatë viteve të 90-ta nga pushteti serb”.
”Lidhjes së Pensionistëve të Kosovës, i shpreha gjithë gatishmërinë time dhe të MPMS-së, se në asnjë moment nuk do të lejojmë që të nëpërkëmben të drejtat e kësaj kategorie shoqërore shumë të respektuar”.
