Rasti i Granit Elshanit transferohet për gjykim në Gjykatën Themelore në Gjakovë
Gjykata Themelore në Pejë nuk do të gjykojë më rastin penal ndaj të akuzuarit Granit Elshani i cili nga Prokuroria Speciale e Republikës së Kosovës (PSRK) akuzohet për vrasje të rëndë, tri tentim vrasje dhe shkaktim të rrezikut të përgjithshëm.
Kjo pasi ky rast tani e tutje rasti ndaj Elshani do të gjykohet në Gjykatën Themelore në Gjakovë.
Një gjë të tillë për “Betimi për Drejtësi”, e ka konfirmuar zëdhënësja e Gjykatës Themelore në Pejë, Tringa Zhuti.
Sipas Zhutit arsyeja e transferimit të lëndës në Gjykatën e Gjakovës është bërë me kërkesën e kryetarit të Gjykatës Themelore në Pejë, Armend Berisha, për shkak të mungesës së gjyqtarëve të krimeve të rënda dhe gjyqtarëve tjerë të cilët kanë mbetur, kanë bazë për përjashtim në gjykimin e këtij rasti.
“Për shkak të pengesave faktike për formimin e trupit gjykues pas pensionimit të kryetarit të trupit gjykues sepse ka mungesë të gjyqtarëve të krimeve të rënda, ndërsa gjyqtarët që kanë mbetur ka pasur bazë për përjashtim”, tha Zhuti.
Ndryshe, lidhur me këtë rast, Gjykata Themelore në Pejë, më 30 maj të vitit 2018, ka shqiptuar 25 vjet burgim, ndaj Granit Elshanit, i cili akuzohet për vrasje dhe tri tentim vrasje, për ngjarjen që kishte ndodhur në natën e 2 janarit të vitit 2010, në diskotekën “City Club”, në Pejë.
Kurse, Apeli kishte anuluar aktgjykimin në fjalë, duke miratuar ankesën e mbrojtësit të mëparshëm të akuzuarit Granit Elshani, avokati Ndrecë Dodaj, për shkak se aktgjykimi i shkallës së parë ishte marrë në shkelje esenciale të dispozitave të procedurës penale dhe vërtetim jo të plotë të gjendjes faktike.
Gjykata e shkallës së dytë ka vlerësuar se dispozitivi i aktgjykimit të shkallës së parë, është në kundërshtim me vetveten dhe me arsyetimin e aktgjykimit dhe nga provat e administruara ka kundërthënie në mes dëshmive të dëshmitarëve rreth përshkrimit të personit i cili ka shtënë me armë.
Sipas aktakuzës së Prokurorisë Speciale të ngritur më 25 nëntor 2016, thuhet se më 2 janar të vitit 2010, në diskotekën “City Club” në Pejë i akuzuari Granit Elshani, kishte hyrë me dy revole të tipit “TT” dhe kishte filluar të shtinte në drejtim të tani të ndjerit Besart Shabi dhe Valdet Kelmendit, i cili ishte plagosur.
Siç përshkruhet në aktakuzë, natën kritike Granit Elshani, shënjestër të vrasjes kishte anëtarin e familjes Kelmendi, Valdetin, por që plumbi kishte goditur Besart Shabi, i cili kishte qëlluar afër tij.
Sipas prokurorit, atë natë lëndime kishin pësuar edhe persona të tjerë që ishin mbledhur për të festuar, ndër ta edhe zyrtari policor, Hasan Buqaj.
