Përparim Rama, kryetar i Prishtinës, ka shpërblyer me tender 150 mijë eurosh kompaninë “Sunny Hill”, pronë e mikut të tij të ngushtë, Dukagjin Lipa.

Kontratën, palët, e kanë finalizuar më 3 gusht 2022, një ditë para se të nis festivali me të njëjtin emër, i cili sivjet do të mbahet në Gërmi.

Në dosjen e tenderit, të cilën e ka shqyrtuar “Front Online”, nuk janë dhënë detaje se për çka konkretisht do të derdhen këto para nga komuna tek kompania.

“Front Online” ka kontaktuar komunën për informata shtesë, por nuk ka marrë akoma përgjigje.

Veçse e qartë është se Përparim Rama dhe Dukagjin Lipa janë miq të mirë prej kohësh.

Kjo dokumentohet edhe përmes fotografive që ata kanë publikuar në “Facebook”.

I tillë është ky postim në tetor të 2021-ës.

“Sunny Hill” ishte kryetemë në Kosovë javë më parë.

Kjo si rezultat që festivali fillimisht u ndalua në mungesë të akordit për të marrë në shfrytëzim një tokë prej 17 hektarësh në komunën e Prishtinës për 99 vjet.

Fjala ishte për një parcelë në Bërnicë të Poshtme.

Presioni që erdhi nga figura të rëndësishme të jetës publike bëri që Qeveria të aktivizohet dhe të rikthejë “Sunny Hill”-in në Prishtinë, shtëpinë e vet.

U premtua po ashtu se do të gjendej një zgjidhje afatgjate sa i përket lokacionit.

“Sunny Hill Festival” nis sot më 4 gusht dhe përfundon më 7 gusht.

Aty do të përformojnë këngëtarët me famë botërore, si Dua Lipa, DJ Diplo, Skepta dhe J-Balvin. E krahas tyre edhe këngëtarë të estradës tonë.