Trotinetët elektrikë nuk do të lejohen të qarkullojnë më shesheve të Prishtinës.
Vendimin e ka marrë urgjentisht vetë kryetari i komunës, Përparim Rama dhe ai do të vlejë deri sa të kompletohet rregullorja që specifikon përdorimin e këtyre mjeteve lëvizëse në hapësirat publike.
Ndalesa, pos në sheshe, vlen edhe në vendet ku ka frekuentim të madh të këmbësorëve.
“Me vendim të Kryetarit, kemi ndaluar qarkullimin e trotinetëve elektrik në sheshet e Prishtinës, dhe në vendet ku ka frekuentim të madh këmbësorësh! Kjo masë e domosdoshme është marrë deri në votimin e rregullores e cila është duke u punuar”, ka thënë në një postim në Facebook nënkryetari i komunës së Prishtinës, Alban Zogaj.
Vendimi vjen pak ditë pasi në kryeqytet janë shënuar dhjetëra aksidente nga e-trontinetët.
Ankesat e këmbësorëve dhe vozitësve të mjeteve tjera motorike për këtë kategori nuk kanë munguar, që kur fluksi i trotinetëve u shtua.