Qeveria e Kosovës ka marrë sot vendim për ndalimin e organizimit të punëtorive jashtë vendit nga të gjitha ministritë dhe agjencitë ekzekutive, e të cilat kanë të bëjnë me aktivitete mbi hartimin, punimin apo diskutimin e dokumenteve qeveritare, përfshirë strategjitë, koncept-dokumentet, projekt-aktet normative, dokumentet planifikuese dhe të ngjashme.

Zëvendësministri i Financave Agim Krasniqi, tha se përmes këtij vendimi synohet racionalizimi i shpenzimit të parasë publike, ku mjetet buxhetore të Qeverisë dhe ato të organizatave të huaja mbesin në tregun e Kosovës, duke krijuar mundësi shtesë për ekonominë e vendit, veçanërisht për gastronominë dhe hotelerinë.

Krasniqi: Ndalohet mbajtja e punëtorive jashtë Kosovës

“Me qëllim racionalizimit të shpenzimeve të parasë publike, në respektim të kufizimeve të situatës së pandemisë dhe stimulim të ekonomisë vendore konkretisht të sektorit të hotelerisë dhe gastronomisë ne propozojmë që Qeveria e Republikës së Kosovës me këtë vendim të ndalojë mbajtjen e punëtorive jashtë territorit të Republikës së Kosovës. Ky veprim është në përputhje edhe me programin për rimëkëmbje ekonomike, nëpërmes të cilit do të siguroheshin që paratë e buxhetit dhe organizatat, donatorët të përfundojnë në tregun vendor, veçanërisht këta dy sektorët që i përmenda…Krahas kësaj ndalese, në përputhje me legjislacionin në fuqi, ky vendim do ta autorizojë Ministrinë e Financave që të caktojë edhe tarifat e shpenzimit ditor, para xhepi që quhen dhe kriteret tjera për punëtoritë që organizohen brenda Kosovës”, tha ai.

Lidhur me këtë vendim ka pasur reagime brenda kabinetit qeveritar, ku kryeministri Avdullah Hoti, duke iu drejtuar zëvendësministrit Krasniqi, tha se është ekonomist dhe dëshiron ‘t’i lë krejt brenda vendit’.

Hoti: Ekonomist, dëshiron t’i lësh paratë krejt brenda

“Ekonomist donë me e lanë krejt brenda”, tha ai.

Ndërsa, ministri i Bujqësisë Besian Mustafa, tha se si ministri në Parkun nacional Blinaja kanë salla të takimeve ku mund ato mund të zhvillohet, por ka nevojë për investime të vogla shtesë. /M.Duraku/