Zjarrfikësit janë përballur me mjaft sfida edhe gjatë periudhës së pandemisë në vendin tonë.Kryetari i Shoqatës së Zjarrfikësve të Kosovës, Muharrem Beka ka folur rreth vështirësive që zjarrfikësit kanë pasur gjatë vitit 2020.

“Gjatë pandemisë na ka përcjell e njëjta situatë si edhe institucionet e tjera, mirëpo për zjarrfikësit vështirë ishte problemi i organizimit dhe përkujdesjes institucionale, që askush nuk është interesuar për mbarëvajtjen e angazhimit në kohë pandemie, sigurimi i pajisjeve mbrojtëse, dezinfektimi dhe testimi i zjarrfikësve për Covid. Zjarrfikësit e kanë kaluar këtë kohë me mjaft shumë vështirësi, pasi që nuk kanë pasur përkrahje as nga niveli qendror e as nga ai lokal, andaj ka pasur kujdes minimal ndaj kësaj kategorie”, ka thënë Beka.

Ai ka thënë se koronavirusi nuk ka kursyer as zjarrfikësit, ku ka pasur dhjetëra raste pothuajse në të gjitha komunat e Kosovës.

Tjetër sfidë për zjarrfikësit gjatë pandemisë ka qenë edhe gjendja financiare, ku Beka ka thënë se ende ka diskriminime ndaj zjarrfikësve nga institucionet.

“Zjarrfikësit në fillim ishin në pakon emergjente ku përfituan edhe shërbimet e tjera si shëndetësia e policia, mirëpo në pakon tjetër, zjarrfikësit u përjashtuan pa asnjë arsye dhe padrejtësisht së bashku me policët (përpos atyre që kanë qenë në teren), duke pasë parasysh punën e vështirë që bëjnë zjarrfikësit, por që ende janë pa përkujdesje institucionale pasi që askush nuk kujdeset për këtë kategori. Ja vlen të ceket, zjarrfikësit janë kategoria që kanë pagën më të ulët në nivel vendi, nuk kompensohemi për ndërrimet e natës, për festat shtetërore dhe fetare e as për orët jashtë orarit”, ka thënë Beka për Portali.info.

Ai ka thënë se kërkesat e zjarrfikësve nuk dallojnë nga ato të vitit 2020.“Kërkesat e zjarrfikësve edhe në vitin 2021 janë të njëjtat si edhe vitet qe lam pas, kërkesa të pa plotësuara me dekada, kërkesat e zjarrfiksëve janë:

1.Të zgjidhet Statusi juridik për zjarrfikës, Të definohen kompetencat menaxhuese në mes të AME/MPB dhe Komunave.

2. Të nivelizohet koeficienti i zjarrfikësve në nivel të Komunave dhe të ngritet në vlerën 6-të, tash në disa Komuna 4.83 dhe në disa Komuna 5.5.

3. Të nivelizohet rrezikshmëria në punë me Policinë,

4. Të sigurohen pajisje dhe mjete për punë.

5. Të kompensohen ndërrimet e natës, festat dhe orët jashtë orarit, të vetmit janë zjarrfikësit qe nuk kompensohen.

6. Të bëhet sigurimi shëndetësor, duke pas parasysh punën e rrezikshme që bëjnë zjarrfikësit dhe duhet cekur se edhe lëndimet në vendin e punës që pësojnë zjarrfikësit, kompensimet për shpenzime mjekësore i kryejnë vetë me buxhetin e varfër të tyre.

7. Numri i zjarrfikësve në nivel vendi është shumë i vogël, jashtë çdo kriteri duhet të jenë një zjarrfikës në 1500 banorë dhe brengosëse është edhe mosha mesatare që është mbi 48 vjet.

8. Sigurimi i shujtës, për shkak të specifikave të punës dhe vështirësive gjatë punëve në teren”, ka thënë Beka.

Beka ka thënë se tash e një dekadë zjarrfikësit kanë ngritur zërin për padrejtësitë që bëhen ndaj tyre nga institucionet lokale dhe qendrore, andaj edhe shpreson për përmirësimin e këtyre kushteve gjatë vitit 2021.