Anëtarët e mazhorancës në Komisionin Hetimor për Shërbimet Publike të Sterilizimit dhe ‘Check- up’ në Shëndetësi, vijuan mbledhjen e cila më herët ishte deklaruar e mbyllur, sipas tyre, në mënyrë të njëanshme nga kryetarja Albana Vokshi dhe pa vendim të ndërmjetëm.

Pas 3 orësh debatesh për procedurë, por pa arritur gjuhën e përbashkët për të miratuar planin e hetimit apo kërkesat për informacion, anëtarët e mazhorancës në Komisionin Hetimor të Shëndetësisë u mblodhën pa opozitën.

Nënkryetari i komisionit, Plarent Ndreca tha se “në planin e hetimit të ekspertëve të propozuar nga mazhoranca janë të përfshirë të gjitha pikat që ata kanë kërkuar si në planin paraprak edhe në planin e dorëzuar nga ekspertëve. Plani ynë është i gjerë dhe më i detajuar dhe kap një marzh më të gjerë të veprimtarisë së Ministrisë së Shëndetësisë dhe që lidhet me arsyet apo pse-të që duhet t’u jepet përgjigje nëpërmjet këtij hetimi dhe pse ka shkuar Ministria e Shëndetësisë për të marrë vendim për këto dy koncesione”.

Sipas tij, që të bëhet kjo duhet të ketë një hetim përpara se ky vendim të jetë marrë.

Anëtarët e mazhorancës në vijim të mbledhjes miratuan me 8 vota pro nisjen e hetimit parlamentar, si dhe miratuan kërkesat për marrjen e provave drejtuar institucionve sipas kërkesave të opozitës dhe mazhorancës.

Ky propozim, për fillimin e hetimeve ishte parashtruar vazhdimisht gjatë mbledhjes së sotme prej anëtarëve të mazhorancës, por u refuzua nga kryetarja Albana Vokshi dhe anëtarët e tjerë të opozitës./ATSH