Drejtori i Zyrës për Kosovë në qeverinë serbe, Petar Petkoviq, ka vlerësuar se është duke u zhvilluar një fushatë e sinkronizuar e Prishtinës kundër serbëve.
Petar Petkoviq në llogarinë e tij në Twitter ka shkruar se “ai që tund armët dhe thërret për luftë, sulmon dhe akuzon serbët dhe Beogradin është Albin Kurti”.
“Ata që janë vatër krimi duan të kriminalizojnë serbët në veri”, ka thënë Petkoviq, duke iu referuar Ministrit të Punëve të Brendshme të Kosovës, Xhelal Sveçla, i cili mbrëmë e ka cilësuar veriun e Kosovës si Eldorado për kriminelët.
Petkoviq shtoi se “ata që i rrënuan manastiret tani dëshiron t’i ruajë Hajrullah Çeku”, i cili, ra fjala, vlerësoi se manastiri i Deçanit është i sigurt.
Kryeministri i Kosovës ka përsëritur akuzat ndaj Serbisë për sulme të mundshme në Kosovë, me pretendimin se Kosova është e gatshme të mbrohet./FrontOnline/