Javën që shkoi, kuorumin në Kuvend, nuk e patën.

E nuk dihet nëse partitë e koalicionit qeveritar do të arrijnë ta bëjnë atë edhe këtë javë.

Për fatin e sigurimit të 61 numrave e datën e mbajtjes së seancës së re ku do të hidhet për votim në lexim të dytë projektligji për Rimëkëmbje Ekonomike, pritet të dihet gjatë javës.

“Mbetet të shihet gjatë javës”, tha shkurt për Front Online Arben Gashi, shef i grupit parlamentar të LDK-së.

Brenda po të njëjtës kohë do të kuptohet nëse do të shkojnë për ose jo votat e 24 deputetëve të PDK-së.

Për to, kryesia e kësaj partie, do të diskutojë e vendosë të mërkurën.

“E kemi shqyrtuar seriozisht mundësinë e votimit. Në kryesi ka pasur mendime pro dhe kontra. Po shpresoj që të mërkurën në takimin e kryesisë edhe për këtë kemi me marrë vendim”, tha Shaqir Totaj, nënkryetar i kësaj partie për Front Online.

Rezultati që del nga ky organ mund të ndikojë edhe në zhvillimet brenda Komisionit për Financa e Transfere në Kuvend.

Anëtari i tij nga radhët e PDK-së, Kujtim Gashi, po ankohet se këtu rekomandimet e tyre mes leximit të parë dhe të dytë rreth projektligjit nuk po merren fare parasysh nga deputetët e pozitës.

“ Janë tre amandamente të cilat i ka propozuar PDK-ja per mes deputetit Bekim Haxhiu, të cilat kanë pas për qellimin e kategorizimit në 3 grupe per terheqjen e mjeteve nga trusti, 10% 20% 30% dhe rimbursimin e tyre pas 5-7 vitesh te cilat nuk janë marrë parasysh nga qeveria, përkatesisht nga deputetet e koalicionit në komisionin për buxhet dhe transfere”, theksoi Gashi për Front Online.

Projektligji për rimëkëmbje ekonomike, që më 22 korrik u miratua në Qeverinë e Kosovës, kap vlerën prej 385 milionë eurosh.

Me të parashihen të ndihmohen bizneset, pas humbjeve të shkaktuara nga pandemia e koronavirusit.