Shefi i grupit Parlamentar të PDK-së, Abelard Tahiri ka thënë se kanë kërkuar në vazhdimësi nga kryeministri që ti adresohet Kuvendit dhe qytetarëve me prioritetet që duhet t’i ketë, duke përfshirë shëndetësinë, arsimin dhe ekonominë.
Ai, ka treguar se në javën e ardhshme do t’i thërrasin tri debate parlamentare, shkruan Front Online.
“Sot si grup parlamentar kemi vendosur që ti thërrasim tri debate. Debati i parë me dështimin e Qeverisë me sigurimin e vaksinës, në programin “Krejt dhe Drejt” e ka pas që do të bashkëpunojë me Shqipërinë për sigurimin e vaksinave por ka ndodhur e kundërta ai ka refuzuar vaksinimin për mësimdhënësit dhe gjendja e rëndë në spitale që ka kapluar vendin”, ka thënë ai.
Ai i ka bërë thirrje kryeministrit Kurti dhe ministrit Vitia që të vijnë të sqarojnë këtë papërgjegjësi.
Çështje e dytë sipas Tahirit, është edhe organizimi i arsimit në të gjitha nivelet në gjithë Kosovën, duke pasë parasysh gjendjen me pandeminë.
“I bëjmë thirrje Kurti dhe Nagavcit që të sqarojnë para qytetarëve dhe deputetëve që të tregojnë angazhimin e tyre për arsimin në Kosovë”, ka thënë ai.
Çështje e tretë, Tahiri thotë se është mjaftë e rëndësishme sepse se ndërlidhet me situatën ekonomike në Kosovë.
“Ende nuk kemi qartësi për implementimin e Pakos për Rimëkëmbje ekonomike, nuk kemi qartësi për 60 mijë persona që kanë humbur punën, dhe se cila do të jetë pakoja e ardhshme për të mbështetur bizneset dhe qytetarët”, ka shtuar ai./Front Online/