Partia Populiste e Lirisë në Austri i ka dorëzuar Parlamentit vjenez një projekt-rezolutë, përmes së cilës kërkon çnjohjen e Pavarësisë së Kosovës.

Kërkesa është dorëzuar nga shefi i grupit parlamentar të partisë në Vjenë, Maximilian Kraus, teksa në të theksohet se Kosova nuk është shtet i pavarur.

“Kosova ishte pjesë e Serbisë dhe në kundërshtim me të drejtën ndërkombëtare u nda nga Serbia pas bombardimeve të NATO-s në vitin 1999. Deri më sot shumica e shteteve nuk e kanë njohur si të pavarur. Njohja e Kosovës nga SHBA-ja dhe vendet evropiane jo vetëm ka shkelur sovranitetin dhe integritetin territorial të Serbisë, por edhe Rezolutën 1244 të OKB-së”, thuhet në kërkesën e FPÖ-së.

Tutje, në projekt-rezolutë thuhet se marrëdhëniet e Kosovës me Serbinë janë përkeqësuar edhe më shumë; se shumica shqiptaro-myslimane është kundër minoritetit ortodoks serb dhe se autonomia juridike e politike e pakicës nuk është e garantuar.

Ndër të tjera, u përmenden deficitet në sundimin e ligjit dhe luftën kundër korrupsionit, teksa përmendet krimi i organizuar si problem veçanërisht i madh.

FPÖ në kërkesë thotë se për të gjitha këto dorëzojnë kërkesë kundër njohjes së Kosovës dhe anëtarësimit të saj në Bashkimin Evropian.

Lidhur më këtë, i menjëhershëm ka qenë reagimi i komunitetit shqiptar në Austri.

Niq Krasniqi e quan skandal këtë rezolutë.

Niq Krasniqi, veprimtar i njohur shqiptar në Austri, me anë të një postimi në Facebook, e ka quajtur skandal këtë rezolutë.

“Kjo parti njihet për politikat kundër BE-së, kundër migrantëve dhe pro politikave të Rusisë, por fakti që po bëhet edhe zëri zyrtar i kërkesave nacionaliste të Serbisë është më se skandaloze për politikën austriake.

Në fakt, është e turpshme që politika shoviniste dhe klero-fashiste e Serbisë ka gjetur mbështetje në politikën austriake, ka shkruar ai, përcjell albinfo.at.

Krasniqi ka shtuar se është alarmante për shoqërinë austriake në cilin drejtim politik po lëviz kjo parti e së djathtës (ekstreme), teksa ka kërkuar nga partitë e tjera në Austri që të distancohen nga partia FPÖ:

“Partitë e tjera austriake duhet të distancohen nga kjo parti që përkrah politika të Rusisë dhe të mobilizojnë votuesit për t’i treguar FPÖ-së në mënyrë demokratike se jo vetëm që e kanë gabim me këtë politikë, por edhe do të dështojnë”, thekson ai duke kërkuar edhe nga komuniteti shqiptar në Austri që të mobilizohen në zgjedhjet parlamentare të Austrisë, ashtu siç u bënë bashkë në zgjedhjet parlamentare të Evropës dhe votuan masovisht për ÖVP dhe deputetin Lukas Mandl.

Ndryshe, FPÖ-ja doli e para parti në Austri në zgjedhjet evropiane të këtij muaji.