Zyra e Rregullatorit për Energji (ZRrE) ka paralajmëruar shqyrtim të jashtëzakonshëm të tarifave të energjisë elektrike për vitin 2023.

Kryetari i Bordit të  ZRrE-së, Ymer Fejzullahu, tha sot se janë plotësuar të gjitha kushtet ligjore për këtë shqyrtim të tarifave, shkruan Front Online.

Por, nuk ka treguar se sa mund te ketë rritje.

Lidhur me këtë paralajmërim për Front Online, kanë folur deputetë të opozitës dhe përfaqësues të bizneseve.

Bunjaku-Rexhepi: Qytetarëve nuk iu ka mbetë të jetojnë në Kosovë

Deputetja e LDK-së, Valentina Bunjaku-Rexhepi thotë se qytetarëve të Kosovës më nuk iu ka mbetur të jetojnë në këtë vend.

 “Realisht qytetarëve më s’iu ka mbetë me jetua në Kosovë, duke e pas parasysh rritjen e inflacionit, duke pas parasysh që pagat nuk kanë pas rritje dhe nëse edhe njëherë rritet çmimi i energjisë elektrike sinqerisht nuk e di se si do të jetojnë qytetarët në Republikën tonë”, ka thënë ajo për Front Online.

E, pyetur se cilat do të jenë format e kundërshtimit të tyre si LDK-së në rast se ndodhë kjo, ajo ka deklaruar se do ta kundërshtojnë këtë, por pa treguar se si, pasi që ende nuk është marrë asnjë vendim rreth kësaj.

“Në rast se ndodhë rritja e çmimit ne si LDK kemi me ngrit zërin në parlamentin e  Kosovës, kemi më ngrit zërin në media dhe po besoj që qytetarët po vetëdijesohen që Qeveria Kurti absolutisht nuk e ka hallin e qytetarëve. Ne si deputet aq sa jemi si opozitë po mundohemi me i mbrojt qytetarët dhe mos me leju që kryeministri Kurti me i bë këto padrejtësi që po i bën karshi qytetarëve duke pas parasysh inflacionin dhe pagat e ulëta. Ne do ta kundërshtojmë me gjithë formën dhe mënyrën që ne e kemi”, është shprehur deputetja Bunjaku-Rexhepi.

Ndërsa, deputeti i AAK-së, Pal Lekaj ka thënë sot në komision se në rast se ndodhë rritja e çmimit të energjisë atëherë nga kjo do të pësojnë më së shumti qytetarët.

“Nëse shkoni të rritja e energjisë nuk e di se si do t’ia dalin qytetarët tanë”, ka thënë Lekaj.

Front Online, për këtë çështje ka provuar të marrë përgjigje edhe në PDK, por në këtë parti nuk iu janë përgjigjur thirrjeve telefonike të portalit.

Piraj: Më mirë çmimi më i lartë i energjisë, sesa mungesa e saj

Burim Piraj, pronar i kompanisë “MEKA Hallall Food”, deklaron se nëse ndodhë rritja e çmimit dhe ka mungesë të energjisë atëherë kjo do të ndikonte keq tek bizneset.

“Nëse ndodhë që të rritet çmimi, dhe të ketë ndërprerje të energjisë atëherë ajo do të ndikojë tepër keq”, ka thënë ai, për Front Online.

Por, thotë se më shumë problem u shkakton ndërprerja e energjisë sesa ngritja e çmimit.

“Neve më shumë na bën problem kur ka mungesë të energjisë elektrike sesa ngritja e çmimit, sepse energjia e fituar me gjenerator është shumë e shtrenjtë dhe ka hargjime të paparashikueshme, ndërsa kur energjia është stabile edhe me pas çmimin pak më të lartë është e arsyeshme sepse çmimet e energjisë në botë kanë lëviz. Edhe pse ndoshta do të ndikon në rritjen e kostos së produkteve ,edhe mund të ketë efekt në ngritjen e çmimeve por prapë se prapë një furnizim i rregullt qoftë edhe me një çmim pak më të lartë është shumë më i mirëpritur sesa mungesat e energjisë”, është shprehur Piraj.

Palushi: Nëse rritet çmimi i energjisë bizneset prodhuese do të kenë vështirësi

Që bizneset prodhuese do të kenë vështirësi në rast se rritet çmimi e thotë, Shaqir Palushi, pronar i kompanisë “Frutex”.

“Sigurisht se çdo rritje e çmimit të energjisë elektrike mundet me i vështirësua bizneset në radhë të parë ato prodhuese, por po ashtu ne jemi të vetëdijshëm nëpër rrethanat në të cilat po kalon edhe vendi për shkak të vështirësive në prodhim të energjisë elektrike, por ajo që vazhdon të mos jetë e pranueshme është ndërprerja e vazhdueshme e energjisë elektrike e sidomos tek ne ato janë të përditshme dhe kjo rritje më e lartë e kostos së prodhimit vjen nga mungesa e energjisë elektrike dhe jo ndoshta nga çmimi i saj”, ka pohuar Palushi.

Ai tregon edhe vështirësitë që mund të paraqiten.

“Sigurisht që paraqet vështirësi, e ul marzhën e fitimit, por ne prapë se prapë do të bëjmë përpjekje maksimale që të mos ketë ngritje të çmimeve të produkteve sidomos në këtë periudhë në të cilën po kalojnë qytetarët. Por shpresojmë që kjo ngritje e çmimit të energjisë elektrike nuk do të jetë shumë e lartë por ndoshta do të jetë minimale”, ka thënë ndër të tjera Palushi.

Kuvendi i Kosovës më 2 shkurt të këtij viti nuk ka arritur që të vazhdojë masat emergjente në furnizimin e energjisë si pasojë e mungesës së kuorumit.

Partia Demokratike e Kosovës dhe Aleanca për Ardhmërinë e Kosovës nuk e kanë përkrahur vazhdimin e masave emergjente të energjisë elektrike./Front Online