Shqetësim i madh për Byronë Kosovare të Sigurimit vazhdon të jetë numri i madh i automjeteve të pasiguruara.
Kështu ka bërë të ditur në një konferencë për media ushtruesi i detyrës së drejtorit të Byrosë Kosova të Sigurimit, Sami Mazreku, shkruan Front Online.
“Edhe më tutje shqetësim i madh mbetet numri shumë i madh i automjeteve të pasiguruara. Dëmet që këto i sjellin BKS-së dhe shtetit e kalojnë shumën mbi 3 milionë euro. Ne po kërkojmë ndihmën e BQK-së por edhe institucioneve tjera që ta ushtrojnë ndikimin e tyre për të ndalur këtë trend negativ”, ka deklaruar ai.
Ai ka folur edhe për kartonin e gjelbër duke thënë se në asnjë shtet të botës nuk mundesh më hy pa sigurim.
“Është një rregull që në asnjë shtet të botës nuk mundesh me hy pa sigurim , ajo çka mendojmë në me bë bashkërisht me Bankën Qendrore është që të ulim numrin e automjeteve të paregjistruara dhe të gjejmë forma alternative që edhe qytetarët e Kosovës të dalin lirshëm jashtë Kosovë, ato janë pjesë e fushatës politike që unë nuk kisha dashtë me u lshu”, ka thënë Mazreku në një konferencë për media.
Kurse guvernatori i Bankës Qendrore të Kosovës, Fehmi Mehmeti, ka thënë se janë plotësuar të gjitha kushtet për anëtarësim në Këshillin e Byrosë Evropiane që siguron kartonin e gjelbër, por që pengesë mbete mosanëtarësimi në OKB.
“Sa i përket kartonit të gjelbër, ju e dini që të gjitha kushtet të cilat janë kërkuar për anëtarësim në Këshillin e Byrove janë plotësuar, një ndër ato kushte janë katra, që është ligji për sigurimin e detyrueshëm i cili tashmë ekziston, themelimi i byrosë i cili tash ekziston, qendra informative e sigurimeve gjithashtu dhe themelimi i fondit garantues prej 4 milionë euro veç realisht ka ndodhë. Megjithatë pas dorëzimit të aplikacionit ka ndodhur një pengesë që Kosova mos të jetë anëtare si rezultat e mospranimit në OKB”, ka deklaruar guvernatori Mehmeti.
Personat që hyjnë në Kosovë me auto-vetura duhet të paguajnë 15 euro për qëndrimin prej 15 ditësh. Ndërkaq, qëndrimi për një muaj kap vlerën e sigurimit prej 20 euro./Front Online/
https://www.facebook.com/100224887998265/videos/469067200922335
