Ka filluar seanca e Kuvendit të Kosovës në të cilën pritet të votohet për zgjedhjen e presidentit të ri të vendit, raporton Front Online.
Me këtë rast, kryeparlamentari Glauk Konjufca ka deklaruar se në sallë janë të pranishëm 83 deputetë dhe se ka kuorum për ta zgjedhur presidentin.
Ai me fillimin e seancës ka kërkuar nga deputetët që të vendosin maskën dhe të respektojnë masat mbrojtëse.
Ndërsa, tashmë ka filluar edhe votimi i deputetëve për Presidentin.
Seanca e sotme është vazhdimësi e asaj që u nis dje në ora 19:00, por që u ndërpre për shkak të mungesës së deputetëve, të nevojshëm për të krijuar numrin e duhur në votim. Seanca ka startuar me mbi 30 minuta vonesë.
Në garë për president nga Lëvizja Vetëvendosje është nominuar Vjosa Osmani-Sadriu, ndërkaq kundërkandidati i saj është Nasuf Bejta.
Raundi i parë i votimit u përsërit mbrëmë dy herë, ku në votim nuk morën pjesë 80 deputetë, apo dy e treta e deputetëve, numër ky i cili është i nevojshëm për t’u konsideruar i konsumuar raundi i parë i votimit.
Në këto dy votime morën pjesë në herën e parë 78 deputetë, në herën e dytë 79 përsëri numër i pamjaftueshëm në kutinë e votimit, shkruan lajmi.net.
Në bazë të Kushtetutës së vendit, në rrethin e parë të votimit duhet që të paktën 80 deputetë të marrin pjesë në votim, në të kundërtën votimi përsëritet.
I njëjti rregull për pjesëmarrjen e 80 deputetëve vlen edhe në raundin e dytë të votimit.
Të pranishëm në sallë në seancën e së shtunës ishin 82 deputetët të Lëvizjes Vetëvendosje, të Lidhjes Demokratike të Kosovës dhe ata të komuniteteve joserbe. Po ashtu e pranishme në seancë ishte edhe Albena Reshitaj nga Aleanca për Ardhmërinë e Kosovës.
Por, tre deputetë të Lidhjes Demokratike të Kosovës: Avdullah Hoti, Agim Veliu dhe Driton Selmanaj, pavarësisht se ishin në sallë gjatë votimit, nuk morën pjesë në këtë proces.
Deputetët e tjerë të AAK-së, të PDK-së dhe të Listës Serbe, i bojkotuan punimet e kësaj seance.
Mbetet të shihet nëse sot në Kuvendin e Kosovës do të ketë deputetë të mjaftueshëm për të zgjedhur presidentin e Kosovës derisa mbetet ende enigmë se si do të votojnë këta deputetë.