Rasti i parë i identifikuar me Coronavirus në Kosovë ishte nga komuna e Vitisë. Deri më tani numri i të infektuarve në këtë komunë ka shkuar në 45, raporton portali Front Online.

Lidhur me gjendjen shëndetësore të të infektuarve për Front Online, ka folur zëdhënësi i Shtabit Emergjent në këtë komunë, Tefik Salihu.

Ai tha se gjendja shëndetësore e të infektuarve është stabile.

“Deri tani në Komunën e Vitisë me COVID-19 janë identifikuar 45 persona. Shtatë janë të hospitalizuar, kurse të tjerët janë të vetizoluar dhe po trajtohen në shtëpi. Gjendja e tyre shëndetësore është stabile dhe nën mbikëqyrjen e mjekëve. Deri tani 3 persona janë shëruar”, tha Salihu për Front Online.

Salihu tha se janë duke i identifikuar personat të cilët kanë pasur kontakte me të infektuarit, por deri më tani nuk ka ndonjë person të dyshuar.

“Aktualisht nuk ka persona të dyshuar kontakti, por Komiteti Komunal për Mbrojtje dhe Shpëtim po gjurmon kontaktet e mundshme të personave të infektuar”, tha ai për Front Online.

Ndërsa për ta parandaluar përhapjen e Coronavirusit disa donator nga kjo komunë kanë vendosur dy tunele dezinfektuese në Qendrat e Mjekësisë Familjare.

Salihu tha se si komunë kanë nevojë për rroba mbrojtëse për stafin mjekësorë, ndërsa me pajisje tjera mbrojtëse janë furnizuar nga Ministria e Shëndetësisë./Front Online/