Për shkak të mungesës së anëtarit të trupit gjykues, gjykatësit Gazemend Bahtiri, i cili mungoi për arsye shëndetësore, ka dështuar të mbahet të hënën gjykimi ndaj të akuzuarve Masar Gërdovci dhe Sherfi Krasniqi, në rastin e njohur si “Bon Vivant 1”.
“Mungon gjykatësi Gazmend Bahtiri pasi që gjendet në pushim shëndetësor pas një aksidenti trafiku, andaj në mungesë të kushteve ligjore seanca e sotme nuk do të mbahet”, tha kryetari i trupit gjykues, Avni Syla.
Ndryshe, në seancë ishte prezent prokurori Armend Hamiti si dhe dy të akuzuarit me mbrojtësit e tyre, raporton “Betimi për Drejtësi”.
Kujtojmë se edhe seanca e 11 marsit 2024 kishte dështuar për arsye se shëndetësore të prokurorit të çështjes.
Ndryshe, në seancën e 26 shtatorit 2023, prokurori Armend Hamiti kishte bërë rikualifikimin e veprës penale për të cilën po akuzohet Masar Gërdovci, duke e kualifikuar të njëjtën nga “vrasje e rëndë” në “vrasje”.
Me aktgjykimin e vitit 2019, Masar Gërdovci ishte dënuar me 21 vjet e 8 muaj burgim, pasi që ishte shpallur fajtor për vrasje, ndërkaq Sherif Krasniqi, ishte dënuar me 4 vjet e 3 muaj.
Pas ankesave, Gjykata e Apelit rastin e kishte kthyer në rigjykim.
Më 18 dhjetor 2020, gjykata e shkallës së parë në rigjykim sërish kishte marrë aktgjykim dënues, ashtu që të akuzuarit Masar Gërdovci dhe Sherif Krasniqi, i kishte shpallur fajtorë për vrasjen e rojës në lokalit “Bon Vivant”, duke i dënuar me 24 vjet burgim (së bashku).
Lidhur me ketë vendim, Gjykata Supreme rastin e kishte kthyer në rigjykim pasi që sipas kësaj instance të akuzuarit Gërdovci dhe Krasniqi, janë shpallur fajtorë për veprime të cilat dallojnë nga ato për çka janë akuzuar.
Vendimi i fundit lidhur me këtë rast është marrë më 13 janar 2023, ku Themelorja, Gërdovcin e dënoi me 18 vite burgim dhe 1 mijë e 500 euro gjobë, kurse Krasniqin me 7 vite burgim. Apeli e ktheu çështjen në rigjykim më 13 qershor 2023.
Aktakuza ndaj Masar Gërdovcit dhe Sherif Krasniqit ishte ngritur nga Prokuroria Themelore në Prishtinë më 7 korrik 2015. Ata thuhet se në bashkëkryerje, kishin privuar nga jeta të ndjerin Rr.U, duke kryer kështu veprat penale vrasje të rëndë dhe armëmbajtje pa leje.
