Përderisa Miss Serbia, Valentina Petroviç përmes një reagimi të gjatë i ka kërkuar popullit serb falje pse e ka bërë simbolin e shqiponjës me Miss Kosova dhe Miss Shqipëria dhe mes tjerash e ka quajtur Kosovën si “Kosova i Metohija”, term ky me të cilin vazhdimisht i referohen politikanët dhe serbët në përgjithësi,  duket se Miss Kosovës, Besa Çitaku fakti se e ka bërë simbolin nacionalist serb, atë ngritjes së tre gishtërinjve, nuk i bën aspak përshtypje dhe këtë veprim skandaloz të saj e quan vetëm si një foto të thjeshtë dhe asgjë më shumë, transmeton FrontOnline.

Ajo as që e ka marrë mundin që së paku si kolegia e saj serbe t’i kërkoj falje popullit shqiptarë, e sidomos viktimave të regjimit serb gjatë luftës së fundit në Kosovë, por e akuzon portalin “FrontOnline” se publikimin e kësaj fotoje ku Besa shihet me simbolin serb, e ka bërë vetëm për klikime dhe asgjë tjetër.

Ajo nuk e konsideron aspak fyese për popullin shqiptarë glorifikimin e simbolit serb, atë të tre gishtërinjve dhe insiston se kjo nuk ka të bëjë aspak me një simbol serb por se vetëm është një foto e thjeshtë sipas saj.

Vërtetë një deklaratë dëshpëruese nga një personalitet i cili do të duhej ta portretizonte shtetin e saj, Kosovën në dritën më të mire, duke nxjerrë vlerat kombëtare shqiptare dhe jo duke glorifikuar një simbol nacionalist të një shteti i cili vrau mijëra shqiptarë, dogji dhjetëra mijëra shtëpi dhe dëboi nga Kosova mbi një milionë shqiptarë.

Po aq dëshpëruese është fakti se as organizatorët e Miss Kosova, të cilët duhet të jenë përgjegjës për veprimet dhe sjelljet e të përzgjedhurës së tyre, nuk kanë reaguar ndaj veprimit të Miss Kosovës. Ne i publikojmë si reagimin e Miss Kosova, e po ashtu edhe të Miss Serbia./FrontOnline/