Një tragjedi në një ndeshje futbolli në Guine, në Afrikën Perëndimore, ka lënë të paktën 56 persona të vdekur dhe shumë të tjerë të plagosur, njoftuan autoritetet të hënën.
Ministri i Informacionit, Fana Soumah, tha në një deklaratë se hetimet janë duke vazhduar për të zbuluar shkakun e shtypjes së turmës në një stadium në qytetin jugor të Nzerekore.
Video të shpërndara në rrjetet sociale treguan tifozë që përpiqeshin të dilnin nga stadiumi i mbushur plot. Një video e gjetur nga CNN tregonte tifozë që ngjiteshin mbi një mur ndërsa përpiqeshin të largoheshin nga stadiumi në Nzerekore, në juglindje të Guinesë.
“Qeveria dënon incidentet që prishën ndeshjen e futbollit mes ekipeve të Labé dhe Nzerekore këtë pasdite në Nzerekore,” tha Kryeministri Bah Oury në një deklaratë të mëparshme.
“Qeveria po monitoron zhvillimin e situatës dhe përsërit thirrjen për qetësi në mënyrë që shërbimet spitalore të mos pengohen në dhënien e ndihmës së parë të plagosurve,” tha Oury, ndërsa autoritetet e qytetit u urdhëruan të rikthejnë “qetësinë sociale”.
Deklarata e Oury-t nuk dha një përshkrim të asaj që ndodhi brenda stadiumit, por ai tha se do të vijojë një raport më i detajuar.
Mediaguinee raportoi se përplasjet midis tifozëve dhe forcave të sigurisë filluan për shkak të disa vendimeve të gjyqtarëve, të cilat u pasuan nga një shtypje masive ndërsa turmat përpiqeshin të largoheshin nga stadiumi. CNN nuk ka mundur të verifikojë këto raporte.
Media lokale Avenirguinee raportoi se ndeshja ishte pjesë e një turneu të organizuar nga junta ushtarake në pushtet e Guinesë për të mbështetur kandidaturën e Mamady Doumbouya.
Doumbouya, i cili mori pushtetin në një grusht shteti në vitin 2021 dhe e ka instaluar veten si president, po synon një kandidaturë të mundshme presidenciale në zgjedhjet e pritshme që do të mbahen në vitin 2025.
Doumbouya është një nga disa figura që kanë marrë pushtetin në këtë rajon të paqëndrueshëm që nga viti 2020. Afrika Perëndimore dhe Qendrore kanë përjetuar të paktën tetë grushte shteti të suksesshme që nga viti 2020, ndërsa trazirat politike kanë rritur shqetësimet për një rrëshqitje drejt sundimit ushtarak në një rajon të pasur me burime natyrore, por të varfër ekonomikisht.
