Deputetja e Partisë Demokratike të Kosovës (PDK), Ganimete Musliu gjatë seancës së Kuvendit të Kosovës ka kërkuar nga Qeveria e Republikës së Kosovës që të aprovojnë kërkesat e Policisë së Kosovës, për pagat dhe shujtat ushqimore, raporton Front Online.

Musliu tha se Policia e Kosovës është duke punuar në kushte të rënda, pasi që siç tha ajo, ata që nga fillimi i pandemisë janë duke punuar me nga 12 orë dhe pa asnjë ditë pushimi.

Sipas saj, PDK-ja në vazhdimësi ka kërkuar nga qeveria që të marrin vendim për pagë shtesë dhe shujtat, për Policinë e Kosovës.

“Vendi ynë dhe i gjithë globi po përballet me pandeminë. Në vijën e parë të frontit po qëndron dhe Policia e Kosovës. Ata po punojnë në kushte të rënda. Policia e Kosovës po punon me orar 12 orësh dhe pa të drejtë pushimi. PDK në vazhdimësi ka kërkuar nga qeveria që të marr vendim për pagë shtesë të shujtave ushqimore dhe pagë shtesë për ta”, ka thënë ajo.

Tutje Musliu tha se pagesa prej pesë euro për ndërrimin e natës për Policinë e Kosovës është tallje për ta.

“Pagesa e ndërrimit të natës është minimale. Pagesa prej pesë eurosh për ndërrimin e natës është tallje për Policinë e Kosovës. Policia e Kosovës protestën e sheh si mjet për realizimin e kërkesave të tyre”, ka thënë ndër të tjera deputetja Musliu./Front Online

https://www.facebook.com/FrontOnlineMedia/videos/244622766890196/