I gjithë territori shqiptar është përfshirë këtë të premte nga stuhi shiu. Intensiteti i lartë i reshjeve është shoqëruar me problematika në disa zona, kryesisht në ultësirën perëndimore të vendit. Efekte problematike më të mëdha u vërejtën në Vlorë.
Rrugët e qytetit u bllokuan dhe niveli i ujit kishte arritur mbi 50 centimetra. Kjo vështirësoi ecjen e qytetarëve, por edhe lëvizjen e makinave. Rruga lidhëse e autostradës Vlorë-Fier me Transballkaniken u përmbyt nga reshjet e dendura.
Si rezultat i rritjes së nivelit, uji ka hyrë në disa banesa e dyqane. Brenda kësaj farmacie ngecën pronarët e saj në rrugën “Albano dhe Romina” dhe u desh ndërhyrja e zjarrëfikësve për t’i nxjerrë jashtë.
Bashkia Vlorë u bën thirrje qytetarëve që të kenë kujdes që të mos parkojnë në disa rrugë kryesore të qytetit, pasi pritet që edhe reshjet të vijojnë me intensitet.
Situata problematike u vërejt edhe Lushnje, por pasdite intensiteti i reshjeve ra dhe uji po tërhiqet nga rrugët. Punonjës të bashkisë po pastrojnë nga bllokimet pusetat e akseve rrugore.
Paraditen e së premtes reshjet e dendura shkaktuan probleme edhe në qytete të tjera si Shkodër, Lezhë dhe Durrës, por situata u përmirësua pasdite.
Sipas njoftimeve zyrtare, shërbimet e emergjencës po punojnë në terren për normalizimin e situatës.
Parashikimet e Meteoalb tregojnë se moti do të nisë të përmirësohet gjatë mbrëmjes së kësaj të premteje, duke bërë që të shtunën dhe të dielën të ketë reshje të pakta shiu. /Tv Klan/