Një 23-vjeçare nga Vitia kishte raportuar në Polici për dhunë në familje të fejuarin e saj që ndodhej jashtë vendit, duke thënë se i njëjti po e keqtrajton, duke e kërcënuar edhe me vrasje.

Policia pati nisur hetimet mbi bazën e deklaratave të të resë nga fshati Ramnishtë, por i dyshuari nuk gjendej në Kosovë.

Ky i fundit është kthyer nga Gjermania dhe ka përfunduar në prangat e Policisë.

Burimet brenda Prokurorisë kanë bërë me dije se i dyshuari U.A., është shoqëruar gjatë ditës së djeshme në stacion policor, ndërkohë që në shtëpinë e tij është kryer bastisje, me urdhër të Prokurorit dhe aprovim të gjyqtarit, nën dyshimet për gjësende të kundërligjshme.

Pasi është kryer kontrolli, i riu është intervistuar në Polici, ku është përballur me denoncimin kundër tij, për dhunë, kërcënime e shantazh.

Sipas të fejuarës së tij, problemet mes tyre kanë nisur që nga koha kur janë fejuar prandaj ajo kishte vendosur që të kërkojë ndihmë nga Policia. Ai po dyshohet se në mes të tjerash, në një mesazh që ia kishte dërguar viktimës, i kishte thënë “Kam me të vra ty dhe familjen”.

Prokurori i Shtetit ka vendosur, siç shkruan Sinjali, që ndaj tij të vazhdojnë hetimet dhe të mblidhen prova në lidhje me rastin.