Pas pushimit dimëror, më 4 janar, skuadra e Llapit nisi përgatitjet për stinorin pranveror në elitën e futbollit të Kosovës, raporton FrontOnline.
Djelmoshat e Tahir Batatinës tashmë i janë “përvjelur” punës, derisa deri më 14 janar, do të përgatiten në Podujevë.
Më 15 janar, llapjanët do të zhvendosen në bregdetin turk.
Konkretisht, Llapi do të qëndrojë në Antalia të Turqisë për disa ditë.
Përpos, Superkupës së Kosovës ndaj Ballkanit më 21 janar, Llapi tashmë ka caktuar edhe dy ndeshje miqësore.
FrontOnline nga burime brenda klubit mëson se më 23 janar, Llapi do të përballet me skuadrën nga elita e futbollit të Kazakistanit, FK Kyzylzhar, kurse dy ditë më vonë me polakët e LKS Lodz.
FK Kyzylzhari garon në Premierligën e Kazakistanit dhe momentalisht e zë vendin e dhjetë në tabelë.
Kurse, LKS Lodz garon në divizionin e dytë të futbollit polak dhe momentalisht zë vendin e tretë në renditje.
Portali mëson se për shkak të ndeshjes së Superkupës së Kosovës, Llapi nuk ka mundur aktualisht të aranzhojë miqësore tjera.
Ndryshe, edhe sivjet, Tahir Batatina me skuadrën e tij synojnë Kupën e Kosovës, e cila dërgon në garat evropiane./FrontOnline/