Pandemia Covid 19 padyshim që ka shkaktuar humbje të mëdha në ekonominë e vendit tonë, veçanërisht në sektorin e Gastronomisë dhe Turizmit, e cila ka ardhur si pasojë e qarkullimit të vogël të njerëzve për shkak të pandemisë dhe poashtu sepse nuk janë lejuar të punojnë disa veprimtari shumë të rëndësishme dhe nuk është lejuar edhe mbajtja e Dasmave vitin e kaluar, të gjitha këto që kanë pasur ndikim shumë të rëndësishëm në zhvillimin ekonomik të vendit, sidomos në qarkullimin e mallrave, shërbimeve dhe parasë.

Njëra ndër çështjet që është diskutuar shumë gjatë kësaj kohe është pikërisht lejimi apo moslejimi i dasmave për këtë vit dhe kryesisht është paragjykuar më shumë grupi i artistëve apo këngëtarëve, të cilët me të drejtë kanë kërkuar që të lejohet zhvillimi i veprimtarisë së tyre, sikur po lejohen të gjitha veprimtaritë e tjera.
Por, më lejoni të sqaroj se lejimi i Dasmave nuk ka të bëjë aspak vetëm me grupin e artistëve, por kjo veprimtari është promotor i zhvillimit ekonomik, pasi ka ndikim thuajse edhe në të gjithë sektorët e tjerë, siç janë: turizmi dhe hoteleria, gastronomia, bujqësia, blegtoria, argjendaria, tekstili etj.

Lejimi i dasmave në vendin tonë nënkupton se shumë bashkatdhetarë do të vizitojnë Kosovën këtë vit, të cilët me vizitën e tyre i kontribuojnë shumë zhvillimit të sektorit të turizmit, hotelerisë dhe gastronomisë në radhë të parë, e cila pastaj ndërlidhet edhe me zhvillimin edhe të veprimtarive të tjera të rëndësishme, siç janë psh: artizanatet, sallonet e bukurisë etj.

Pra, vendimi për lejimin e dasmave është një nga vendimet më të rëndësishme në vendin tonë, sepse me lejimin e dasmave edhe fermerët do të kenë ku të shesin produktet e tyre. Gjithashtu, argjendaritë do të kenë ku të shesin produktet e tyre, si dhe gastronomia si një nga sektorët më të rëndësishëm do të filloj të rimëkëmbet.

Lejimi i dasmave poashtu luan rol të rëndësishëm në uljen e papunësisë, i cili është një indikatorë shumë i rëndësishëm i zhvillimit ekonomik. Do të lejohet të punojnë artistët, kameramanët, dekoret, sallat e dasmave, sallonet e bukurisë etj., dhe të gjitha këto do të zbusin nivelin e madh të papunësisë në vendin tonë.

Si përfundim, vendimi për lejimin e dasmave do të jetë vendim krucial që do të ketë ndikim shumë të madh në të gjithë sektorët e lartëcekur dhe do të kontribuoj shumë në zhvillimin ekonomik të vendit dhe do të shërbejë si pikë kthese apo e rimëkëmbjes nga kriza që e ka kapluar vendin tonë si pasojë e pandemisë Covid 19.