Lautaro Martinez ka shënuar 22 gola në 23 ndeshje në Serie A këtë sezon dhe ka një shpresë reale për të arritur rekordin e vendosur nga Ciro Immobile dhe Gonzalo Higuain.

Ylli argjentinas shkëlqeu në ndeshjen e fundit ndaj Lecces të dielën, duke shënuar dy gola në fitoren 4:0 të “Nerazzurrëve”.

Ai shkoi në kuotën e 22 golave në kampionat, duke qenë kështu edhe golashënuesi më i mirë.

Me Interin që ka ende një ndeshje më pak, atë ndaj Atalantas, skuadra e Simone Inzaghit do të zhvillojë edhe 13 ndeshje deri në fund të sezonit.

Interi ka një epërsi prej nëntë pikësh ndaj vendit të dytë, Juventusit, dhe mund ta zgjasë atë në 12 me një fitore eventuale.

“Tuttomercatoweb” shkruan se Lautaro tani ka 13 ndeshje për të shënuar edhe 14 gola, që do të barazonte rekordin prej 36 golave në një sezon në Serie A të vendosur nga Higuain te Napoli në sezonin 2015/16 dhe Immobile te Lazio në sezonin 2019/20.

Duke marrë parasysh që vetëm dy nga 22 golat e tij këtë sezon kanë qenë nga penalltia, ai ka gjasa të mëdha për të arritur rekordin nëse vazhdon me këtë ritëm./Express