Yoshihide Suga pritet të bëhet kryeministër i Japonisë pasi e mori miratimin për t’u bërë kryetar i partisë në pushtet pas dorëheqjes së kryeministrit të deritashëm, Shinzo Abe.
Pjesa më e madhe e deputetëve të Partisë Liberaldemokrate nga të dyja dhomat e Kuvendit dhe përfaqësuesit e prefekturave i dha përkrahje Sugas, i cili ka qenë njeri besnik i Abes. Miratimin për kryetar partie e mori me 377 vota nga 534 të mundshme. I dyti ishte ish-ministri i Jashtëm, Fumio Kishida, me vetëm 89 vota.
Suga ka qenë fytyrë publike e administratës së Abes për gati tetë vjet si zëdhënës kryesor i qeverisë. Ai pritet të zgjidhet zyrtarisht kryeministër pas votimit në të dyja dhomat e Kuvendit të mërkurën, shkruan The Guardian.
Djali i një fermeri të dredhëzave në pjesën veriore të Japonisë u bë shpejt figurë favorite për ta zëvendësuar ish-kryeministrin Abe që dha dorëheqje muajin e kaluar për arsye shëndetësore.
Duke premtuar se do të ndërtojë një kabinet qeveritar që do të punojë për popullin, ai tha: “Do t’ua kushtoj tërë veten time Japonisë dhe popullit japonez”.
Detyrat më urgjente të tij do të jenë mbajtja nën kontroll e numrit të rasteve të koronavirusit, të cilat ditëve të fundit kanë shënuar rënie, dhe nxjerrja e ekonomisë nga recesioni dhe efektet negative të pandemisë.
