Sot në media u raportua për arrestimin e të dyshuarit për disa vjedhje brenda dy javësh në tri markete në Prishtinë.
Burimet e Sinjalit brenda Prokurorisë kanë bërë të ditur se personi që ra në prangat e Policisë është Kadri Goxhufi, 27-vjeçar.
Siç mëson Sinjali pas një pune hetimore, është arritur që 27-vjeçari të identifikohet dhe të arrestohet.
Pas arrestimit, i njëjti është dërguar në stacion policor, ku gjatë intervistimit e ka pranuar që ka kryer vjedhjet në markete.
Prokurori kujdestar ka urdhëruar që i dyshuari të ndalohet në kohëzgjatje prej 48 orësh dhe ndaj tij të iniciohet rasti “vjedhje e rëndë”.
Shënim: Personi i apostrofuar në këtë artikull prezumohet i pafajshëm derisa fajësia e tij të mos provohet me vendim të formës së prerë nga gjykata.