Kryetari i Komunës së Gjilanit, Alban Hyseni, lidhur me projektin e ndërtimit të stadiumit të qytetit, ka theksuar disa çështje kritike që kanë dalë në pah gjatë analizës së projektit.
Hyseni në Debat Plus, ka thënë se projekti ka pasur disa mangësitë, duke nisur se kishte filluar ndërtimi për kategorinë dy, ndërsa më pas është ndryshuar kategoria pa filluar procedurat për ndryshimin e kategorisë.
Kjo sipas tij, ka sjellë nevojën për hartimin e projektit përmes një procedure të re të prokurimit, si dhe ndryshimin e kontratës për ekzekutim të projektit për të përshtatur vlerat.
“Kur jam bërë kryetar komune kam takuar palët e ndryshme të përfshira në këtë projekt. Kam kuptuar disa mangësi, e para ka qenë që stadiumi është filluar për kategorinë dy, ndërsa është ndërruar kategoria pa filluar proceduar për ndryshim të kategorisë që nënkupton hartimin e projektit përmes procedurës së re të prokurimit për hartim të tij si dhe ndryshimin e kontratës për ekzekutim të projektit sepse do të ndryshohej edhe vet projekti, vlera”, ka deklaruar ai në emisionin “Debat Plus”.
Dhe sipas tij, kompania ka kërkuar dy parakushte kryesore për të përfunduar projektin, duke përfshirë hartimin e projektit final dhe sigurimin e buxhetit të plotë për këtë fazë.
“Ndërkohë që presioni që ia kam bëtë publikisht tek kompania që ka ekzekutuar punimet ka çuar deri në atë pikë që më ka dërguar zyrtarisht me email edhe ka thënë se na duhen dy parakushte kryesore për të përfunduar projekti., E para është projekti final gjë që nuk e kemi edhe nuk ka qenë në atë kohë. Dhe e dyta që të sigurohet buxheti i tërësishëm për këtë pikë, meqë rast buxheti ka qenë dhe është edhe sot në dispozicion”, ka theksuar ai.
Hyseni ka bërë të ditur se tashmë janë kryer hapa, duke përfshirë hartimin e projektit final, zgjidhjen e çështjes së shpronësimit dhe marrjen e lejes së re të ndërtimit për kategorinë katër.
