Kriza me mungesat e karburantit dhe ushqimit në dyqane për shkak të ndërprerjeve të furnizimit dhe mungesës së shoferëve nuk po qetësohet në Mbretërinë e Bashkuar. Ndërsa ushtria ka hyrë dhe po ndihmon në transportimin e karburantit me cisternë në stacionet e benzinës ditët e fundit, raftet e dyqaneve po bëhen gjithnjë e më të zbrazëta dhe çmimet po rriten.

Kraft Heinz, prodhuesi më i madh në botë i fasuleve të pjekura, keçapit dhe ushqimit për fëmijë, paralajmëroi klientët në fillim të kësaj jave se ata duhet të mësohen me çmimet më të larta të ushqimit. Çmimet e kafesë gjithashtu pritet të rriten pasi inflacioni parashikohet të arrijë deri në tetë për qind vitin e ardhshëm, niveli më i lartë në 30 vjet, transmeton FrontOnline.

Çmimi i kafesë u rrit 73%, ka një mungesë botërore?

Çmimi i kafesë arabike është rritur gati 73 për qind vitin e fundit, por nuk është vetëm një problem britanik. Thatësira dhe ngricat e rënda kanëshkatërruar 20 për qind të bimëve të kafesë në Brazil, eksportuesi më i madh në botë i kafesë.

Dhe në Kolumbi, vendi i tretë më i madh në botë për prodhimin e kafesë, fermerët kanë refuzuar të japin deri në një milion qese kafe këtë vit për të marrë një çmim më të lartë të arabikës. Ekspertët besojnë se mungesa globale e kafesë ka filluar dhe mund të zgjasë për tre vjet.

Kostoja e krizës së jetesës në Britani po përkeqësohet, dhe raftet e shumë supermarketeve janë gjysmë bosh për shkak të mungesës së ushqimeve të tilla si sallata, barishte, qumësht, djathë, mish, peshk, bizele të ngrira dhe pije të gazuara, shkruan Daily Mail.

Përveç mungesës kritike të drejtuesve të kamionëve, zinxhirët e shitjes me pakicë po vuajnë gjithashtu nga mungesa e C02, e cila përdoret në prodhimin e pijeve të gazuara, por edhe për të mbajtur të freskëta disa produkte ushqimore.

Kujtojmë, shkaku kryesor i kësaj krize të furnizimit qëndron në Brexit dhe politikën kokëfortë të qeverisë britanike pasi ajo përfundimisht nxorri vendin nga Bashkimi Evropian në janar të vitit të kaluar. Pasoja e kësaj politike – një mungesë midis 90,000 dhe 120,000 shoferë kamionësh në tregun e punës në Mbretërinë e Bashkuar, sipas shoqatës së Transportuesve të Transportit të Logjistikës në Mbretërinë e Bashkuar – ka rezultuar në një mungesë të përgjithshme në stacione dhe, në një masë më të vogël, në dyqane.

Mungesa e madhe e shoferëve të kamionëve ka shkaktuar kaos në zinxhirët e furnizimit në gjithçka, nga ushqimi në karburant, dhe ka rritur një seri ndërprerjesh dhe ngritjes së çmimeve në prag të Krishtlindjeve./FrontOnline/