Komuna e Ferizajt ka nënshkruar një tender në vlerë 97 mijë euro për vendosjen e kamerave në qytet dhe mirëmbajtjen e tyre.

72 kamera është paraparë të blihen për të bërë vëzhgimin e hapësirave të Ferizajt, raporton “Front Online”.

97 mijë eurot mund të mos harxhohen krejt, meqë kontrata është publike kornizë, me ç`rast shpenzimet bëhen vetëm në bazë të nevojave për kamera e pajisje tjera.

Kontratën e ka fituar konsorciumi “Cimi Electronic dhe Impact”.

Këto kompani u zgjodhën fituese në mesin e katër operatorëve sa konkuruan për fitimin e tenderit.

Ato ofertuan më lirë se të gjitha kompanitë tjera, raporton “Front Online”.

Ky ishte njëherit edhe kriteri kryesor për dhënien e kontratës, i cili hyn në funksion po qe se kompanitë plotësojnë edhe kriteret tjera të kërkuara në Dosjen e Tenderit.

Kontrata mes palëve, tashmë e firmosur, do të vlejë për dy vjet.

Gjatë kësaj periudhe konsorciumi fitues do të ketë për obligim të mirëmbajë kamerat.

Ndërkohë, kryetari i Komunës së Prishtinës, Përparim Rama ka njoftuar se kanë arritur që të finalizojnë marrëveshjen për vendosjen e sistemit të kamerave në hapësirat publike të kryeqytetit me Policinë e Kosovës.

“Tash e sa kohë jemi në bashkëpunim të ngushtë me Policinë e Kosovës për hartimin e marrëveshjes për vendosjen e sistemit të kamerave dhe mënyrën e mirëmbajtjes së rrjetit të kamerave në hapësirat publike të Kryeqytetit, marrëveshje e cila u nënshkrua sot”, ka thënë Rama.

Komuna e Prishtinës planifikon të ndajë 1.2 milion euro për zgjerim të ndriçimit publik dhe vendosje të kamerave të sigurisë në hapësira publike nga buxheti i vitit 2023.

Ky vendim erdhi pasi në një park të Prishtinës, një vajzë 11-vjeçare dyshohet se është dhunuar seksualisht nga 5 persona./Front Online/