Ka përfunduar mbledhja e Komisionit për Legjislacion, Mandate, Imunitete, Rregulloren e Kuvendit dhe mbikëqyrjen e Agjencisẅ Kundër Korrupsionit.

Aty është bërë shqyrtimi i shkresës së Kryetares së Kuvendit që ka të bëjë me mandatin e deputetit Etem Arifi, dhe imuniteti i Behgjet Pacollit.

Pas këtij takimi para mediave është deklaruar kryetari i këtij komisioni, Driton Selmanaj.

Ai ka thënë se nuk e kanë trajtuar çështjen për imunitetin e deputetit Etem Arifi, i cili është dënuar me 1 vjet burgim nga Gjykata.

Kjo, meqë sipas tij, kjo çështje nuk përputhet me përgjegjësinë e komisionit që ai drejton.

E sa i përket çështjes së dytë, asaj të Pacollit, tha se komisioni ka arritur në një përfundim që askush nuk ka të drejtë t’ia ndalojë ushtrimin e mandatit deputetit.

“Ne si komision nuk i trajtojmë çështjet e përfunduara gjyqësore. I dhamë këshillë kryetares që të respektojë Kushtetutën, ligjin. I bëjmë thirrje atyre që të mos dërgojnë çështje në komisione pa asnjë referencë. Çështja e dytë kishte të bënte me shqetësimin e deputetit Pacolli. Kjo në fakt bie në përputhje me temën që duhet trajtuar Komisionin. Pacollit dhe çdo deputeti tjetër duhet t’i mundësohet ushtrimi i mandatit. Këto ishin përfundimet që i nxorëm sot”, u shpreh ai.

Mendim krejt ndryshe për këtë çështje shprehu anëtari tjetër i këtij komisioni, Artan Abrashi i VV-së.

“Kemi të bëjmë me vendim të formës të prerë. Kur kemi nje vendim nga Gjykata ku është i dënuar deputeti nuk ka çka diskutohet më . Komisioni nuk ka dashur ta trajtojë këtë çështje. Nëse ka vendim të formës së prerë automatikisht i pushon mandati. Sa i përket çështjes se Pacollit ne nuk e konstatojmë imunitetin e deputetëve. Kemi menduar se kjo çështje nuk duhet te trajtohet nga ne por nga institucionet shëndetësore”, tha ai raporton Front Online.

https://www.facebook.com/100224887998265/videos/979512689117966/