Faton Peci, këshilltar i u.d presidentes së Kosovës, Vjosa Osmani, ka reaguar pas deklaratës së zëvendësministrit në detyrë të Financave, Agim Krasniqi, i cili ka thënë se zyrtarët në Kuvend dhe Presidencë për festat e fundvitit do të marrin nga 500-600 euro shtesë krahas pagës së tyre.

Peci në reagimin e bërë drejtuar Krasniqit, ka thënë se ai duhet të tregojë se ku janë avulluar 2.1 milionë euro të taksapaguesve të Kosovës.

“Para se të flasë për ‘lulëzim ekonomik’, në Kuvend e Presidencë zëvendësministri i financave le t’i tregon qytetarëve të Kosovës ku u avulluan 2.1 milion euro të taksapaguesve të Kosovës”, ka shkruar ai në Facebook.

Më tej, ai ka thënë se Kuvendi i Kosovës ia ka kthyer Qeverisë në rishikim të buxhetit mbi 1.5 milionë euro kursime.

“Sa për vëmendjen e zv.ministrit dhe të publikut, Kuvendi i Kosovës ia ka rikthyer Qeverisë në rishikim të buxhetit mbi 1.5 milion euro kursime. Prandaj, zv. ministër (drejtor i buxhetit i PAN-it), ku mbeten 2.1 milion euro?! P.S.Vendimi i Kuvendit është kolegjial. Në Kryesi marrin pjesë të gjitha partitë, teksa këtë vendim Kryetarja e Kuvendit nuk e ka votuar”, vijon reagimi i tij.

E, në postimin e Pecit ka reaguar sërish zëvendësministri në detyrë i Financave, Agim Krasniqi. Ai ka thënë se për 20 vjet nuk ka përdor e as keqpërdor buxhetin e Kosovës.

“Për të tjerat ju tregon ish-ministri që as edhe më të voglin cent për 20 vjet nuk kam përdor e zot mos thuaj keqpërdor buxhetin”, ka shkruar ai në koment drejtuar Pecit.

Zëvendësministri në detyrë i Financave, Agim Krasniqi më herët ka thënë se në Kuvend dhe Presidencë të Kosovës po bëhet “lulëzim ekonomik”, pasi që po ndahen shtesat prej 500-600 euro për zyrtarët e Kuvendit dhe Presidencës, për festat e fundvitit.