Anëtari i kryesisë së qendrës së Lëvizjes Vetëvendosje në Prishtinë, Ilir Kërçeli, ka shkruar rreth planit rregullues për lagjen Kalabria dhe protestës së banorëve të kësaj lagje.
Kërçeli tha se lagjja Kalabria, banor i së cilës shkroi se është edhe vet ai, ballafaqohet me kundërmimin e përditshëm nga kolektori, për të cilin tha se kryetari aktual i kryeqytetit, Përparim Rama, pati premtuar se do të përfundohet në 90 ditëshin e parë të qeverisjes së tij.
Ai tha se mungesa e hapësirave rekreative e deri tek mungesa e ngrohjes qendrore, e së fundi, sipas tij, edhe bredhja masive e minjve, për të cilët ironizoi duke thënë se “nuk ka mbetur opsion tjetër veç të lansohet ndonjë ‘platformë’ si ajo me ‘qentë endacakë’ dhe të fillohet apatimi i këtyre minjve, pasi edhe janë bërë pjesë e jetës së përditshme të qytetarëve të kësaj lagjeje”.
“Debati e kundërshtimet për planin rregullues të cilin ka vite e muaj që e ka premtuar kryetari aktual, lidhen me padrejtësitë që i janë bërë qytetarëve të kësaj zone, duke ia ndërruar koeficientin e planin rregullues lagjes nga muaji në muaj. Askush nuk e di se si është bërë vlerësimi ku në disa pjesë mund të ndërtohet me koeficient 1.8 (apo deri ne 5 kate ndërtim) diku me 2.4 koeficient (apo deri në 8 kate ndërtim) e duke përfunduar deri në koeficient 7 (deri në 15 kate ndërtim)”, shkroi Kërçeli, transmeton Klankosova.tv.
Kërçeli akuzoi Ramën se mos vizioni, pabarazia e mungesa e vullnetit për të realizuar një plan të mirëfilltë për qytetarët e Prishtinës, e për banorët e kësaj zone, sipas tij, janë karakteristikat të cilat e përkufizojnë qeverisjen aktuale në Prishtinë.
“Nëse qytetarët e kryeqytetit kanë besuar në prezantimin e kandidatit i cili i fitoi zgjedhjet e fundit në Prishtinë si një arkitekt profesionist e i cili do të bënte zgjidhje logjike e profesionale, nuk do duhej të shpërbleheshin kontraktorë të ndryshëm me kontrata milionëshe për arkitektin e kryeqytetit për të cilin do të shpenzohen 12 milionë euro, e miliona euro vetëm për konsulencë se si do duhet të rekrutohet ky arkitekt. A nuk e zgjodhën qytetarët arkitektin Përparim Rama?”
“Kjo qeverisje nëse asgjë nuk do të mund të bënte më mirë, do të mjaftonte të merrte si model lagjet e vjetra si Dardania, Ulpiana, Bregu i Diellit e lagje të tjera të cilat kanë dëshmuar se janë lagje të cilat përmbushin kërkesat e qytetarëve”, shkroi Kërçeli.
