Para disa ditësh, pronari i barnatores “Rexall”, në Prishtinë, D.A, është sulmuar nga disa persona.
Krahas tij është kanosur edhe vëllai i tij, A.A, po ashtu pronar.
Nga Prokuroria Themelore në Prishtinë kanë njoftuar se për rastin e parë ende janë duke i zhvilluar hetimet, kurse për të dytin atë të kanosjes se ka ndaluar në kohëzgjatje prej 48 orësh dy të dyshuar B.M. dhe A.S. si dhe ndaj të njëjtëve ka paraqitur kërkesë për caktimin e masës së paraburgimit në gjykatën kompetente.
B.M dhe A.S dyshohet të kenë kanosur A.A, vëllain e D.A, i cili u sulmua në Prishtinë.
Njoftimi i plotë:
Prishtinë, 26 maj 2022– Prokuroria Themelore në Prishtinë – Departamenti i Përgjithshëm, njofton opinionin publik lidhur me rastin ku i dëmtuar është pronari i barnatores “Rexall”, në Prishtinë, D.A., i cili para disa ditësh është sulmuar nga disa persona me mjete të forta, ashtu që, prokurori kujdestar, ka autorizuar policinë në ndërmarrjen e të gjitha veprimeve të nevojshme hetimore lidhur me këtë rast, derisa më 24 maj 2022, me urdhër të prokurorit është iniciuar rast në drejtim të veprës penale “Kanosja”, nga neni 181 të KPRK-së, ku i dëmtuar në këtë rast është A.A., (vëllai i të dëmtuarit të lartcekur) dhe me aktvendim mbi ndalim janë ndaluar në kohëzgjatje prej 48 orësh të dyshuarit B.M. dhe A.S., si dhe ndaj të njëjtëve, më 25.05.2022, Prokurori i Shtetit ka paraqitur kërkesë për caktimin e masës së paraburgimit në gjykatën kompetente, në drejtim të veprës penale “Kanosja”, të paraparë sipas Kodit Penal të Republikës së Kosovës.
Ndaj çështjeve penale, Prokurori i Shtetit është duke vazhduar me ndërmarrjen e veprimeve hetimore në koordinim me policinë për sqarimin e plotë të të gjitha rrethanave.
