Kryetari i Kuvendit, Glauk Konjufca priti në takim të përbashkët kryetarin e komunës së Skenderajt, Bekim Jashari dhe përfaqësuesit e Shoqatës Bamirëse “Jetimat e Ballkanit”, në krye me Halil Kastratin.
Jashari uroi Konjucën për detyrën e re dhe për ndërtimin e institucioneve të dala nga zgjedhjet e 14 shkurtit.
Ndërsa Konjufca përgëzoi kreun e Skenderajt për angazhimin dhe punët e realizuara në komunën që ai drejton, duke i ofruar njëkohësisht bashkëpunimin e Kuvendit të Kosovës.
Bashkëbiseduesit theksuan nevojën e sforcimit të angazhimeve për të thelluar më tej bashkëpunimin midis pushtetit legjislativ dhe atij lokal, me qëllim të realizimit në mënyrë sa më efikase të objektivave qeverisëse në të dy nivelet e pushtetit shtetëror.
Në takim u diskutua gjithashtu edhe për sfidat që institucionet e Kosovës kanë para vetes, si në rrafshin e brendshëm ashtu edhe atë ndërkombëtar.
Konjufca po ashtu vlerësoi lart veprimtarinë e Shoqatës Bamirëse “Jetimat e Ballkanit” dhe kreut të saj Halil Kastrati, në ndihmë familjeve të shumta në nevojë anekënd Kosovës.
Ai veçoi sidomos kontributin e kësaj shoqate në ndërtimin shtëpisë së të moshuarve në Suharekë.
