Një investim të “madh” ka bërë Ministria e Shëndetësisë, që udhëhiqet nga Rifat Latifi.

Ajo ka shpenzuar gati 10 mijë euro për blerjen e disa tepihëve, raporton “Front Online”.

Kontratën e ka fituar kompania “IBM SH.P.K”, e cila qe e vetme që ofertoi për këtë tender. Ujdia u nënshkrua më 30 gusht 2022.

Sipas njoftimit për kontratë të publikuar në faqen zyrtare e-Prokurimit, për furnizim me këta tepihë ishin paraparë të shpenzoheshin 11 mijë euro.

Ministri i Shëndetësisë Rifat Latifi, me të marrë detyrën është zotuar se do t’i zgjidhë disa probleme në sektorin e shëndetësisë. Njëri ndër zotimet e Latifit ishte se do ta ruajë ‘trurin shkencor’ që të mos ikin nga vendi. Por, pikërisht më këtë çështje ministri po përballet me protesta.

Shumë infermierë pothuajse çdo ditë po paralajmërojnë ikjen e tyre nga vendi për në shtete të tjera për kushte më të mira të punës.

Ministri Latifi është kritikuar edhe për vizitat e tij të shumta jashtë vendit, pa ndonjë efekt në shëndetësinë kosovare.

Për punën e tij, kritika kishte shprehur edhe ish-ministri i shëndetësisë, Imet Rrahmani.

Rrahmani tha për Front Online se MSH-ja aktualisht është në gjendje të përgjumur.

“Kjo gjendje “e përgjumur” po reflektohet edhe në institucionet ofruese të shërbimeve shëndetësore në të gjitha nivelet. Jemi të vetëdijshëm se edhe më herët nuk ka pasur mundësi të bëhen mrekulli, por së paku ka pasur një vëmendje më serioze nga Qeveria dhe një përkushtim më të madh edhe nga Ministri edhe nga pjesa menaxheriale e institucioneve. Janë zhvilluar projekte konkrete, ka pasur një vizion ku duhet të arrihet, janë arritur rezultate, ndoshta jo të mjaftueshme ama ka pasur ecje përpara”, u shpreh Rrahmani për “Front Online”.

Lexo edhe: Rifat Latifi, ministër me “korrospodencë”