Agron Vllasaliu, i cili e ka të lënduar këmbën e djathë nga pasha e gurit që ra mbi të gjatë incidentit në minierën e Artanës, tha se nuk është i gatshëm ta fillojë punën, pasi që siç tha ai, është duke marrë trajtim edhe nga psikologu, shkruan Front Online.

“Për momentin nuk jam i gatshëm me fillu punën, jam në kontrolle mjekësore, jam në vizitë të ortopedi, psikologu, nuk jam i gatshëm me fillu punën. Kam probleme me këmbë, kemi probleme me stresin dhe depresionin. Por, tash me trajtim mjekësorë do Zoti që bëhemi më mirë.  Jemi tmerruar prej ngjarjes ka mundur të ndodh edhe më shumë”, thotë Vllasaliu.

Por, për këtë minator, fatkeqësi tjetër ishte pamundësia për t’i ndihmuar shokët të cilët mbetën nën rrënojat si pasojë e shembjes së gurit.

“Rasti ka qenë tragjik kur i kemi pa shokët nën guri dhe nuk kemi pasur mundësi t’u ndihmojmë, ka qenë ngjarje tragjike, jo vetëm unë, por edhe shumë tjerë jemi tmerruar”, rrëfen ai për Front Online.