Të hënën në Gjykatën Themelore në Prizren, ka dështuar të mbahet gjykimi ndaj Shaqir Rrahmanajt, i akuzuar për veprën penale “uzurpim i paligjshëm i pronës së paluajtshme”.

Shkak për mos mbajtjen e kësaj seance ishte mungesa e të akuzuarit Rrahmanaj, për të cilin mbrojtësi i tij, avokati Ymer Koro deklaroi se gjendet në Amerikë, ku për shkak të pandemisë nuk ka mundur të kthehet në Kosovë, raporton “Betimi për Drejtësi”.

Lexo Edhe:
Kuvendi i Republikanëve fillon sot me aktivitete të drejtpërdrejta virtuale
Pasi që nuk kishte kushte ligjore për mbajtjen e kësaj seance, gjykatësja Arjeta Gashi deklaroi se shqyrtimi i sotëm do të shtyhet dhe i njëjti u caktua të mbahet më 28 shtator 2020, në ora 11:00.

Ndryshe, sipas aktakuzës së Prokurorisë Themelore në Prizren, Shaqir Rrahmanaj akuzohet se në mënyrë të kundërligjshme uzurpon pronën e paluajtshme, pjesën e parcelës kadastrale nr.4788-2, ZK, Prizren.

Sipas aktakuzës, gjatë ndërtimit të objektit, i njëjti ka tejkaluar lejen ndërtimore dhe në të njëjtën paluajtshmëri ka ndërtuar shkallët e objektit afarist “Hotel City”, krejt kjo në sipërfaqe prej 8 m2, të cilën paluajtshmëri e shfrytëzon dhe e mban në uzurpim, pa asnjë bazë ligjore.

Me këto veprime, ai akuzohet se ka kryer veprën penale “uzurpim i paligjshëm i pronës së paluajtshme”.