Gjykata Themelore në Pejë ka caktuar masën e arrestit shtëpiak për dy të dyshuar për veprën ngacmim seksual dhe dhunë në familje.

Dy persona, babë e bir në Pejë po dyshohet se kanë ngacmuar seksualisht dhe e kanë keqtrajtuar fizikisht një grua.

Sipas njoftimit të gjykatës tashmë është marrë vendimi për masën e arrestit shtëpiak.

Siç bën të ditur Gjykata Themelore në Pejë, i pandehuri I.M., nga data 24.01.2020 e në vazhdimësi gjer me datë 15.09.2020, ngacmon seksualisht personin tjetër dhe atë nusen e djalit të tij, në atë mënyrë që pasi kjo e fundit ishte martuar me djalin e tij, i pandehuri deri sa e dëmtuara ishte vetëm në shtëpi shkon dhe e ngacmon ndërsa e dëmtuara e refuzon deri sa nga shqetësimi i madh vendos ta lajmëroj policinë.

“Me këto veprime i pandehuri I.M dyshohet se ka kryer vepër penale ngacmim seksual”, thuhet në njoftim.

Ndërkaq, i pandehuri B.M., në vazhdimësi ndaj anëtarit të familjes, këtu të dëmtuarës me të cilën ishte e martuar që rreth dy vite, ushtronte dhunë, keqtrajtim fizik dhe psikologjik në mënyrë sistematike duke ju drejtuar me fjalë të ndryshme dhe në mënyrë të vazhdueshme duke e goditur në pjesë të ndryshme të trupit për çka e njëjta detyrohet të marrë edhe qetësues.

“Me këto veprime i pandehuri B.M dyshohet se ka kryer vepër penale ngacmim seksual”, bën të ditur gjykata.

Të pandehurve iu është caktuar masa e arrestit shtëpiak në kohëzgjatje prej një muaji.

Kundër këtij vendimi palët e pakënaqura kanë të drejtë ankese në Gjykatën e Apelit.