Kishat në mbarë Gjermaninë janë duke mbajtur mesha të dielën, për herë të parë pas gjashtë javësh pushimi, pasi qeveria filloi t’i lehtësojë masat e izolimit. Sidoqoftë, shërbyesit kishtarë dhe besimtarët duhet të vendosin maska, të qëndrojnë larg njëri-tjetrit dhe nuk kanë të drejtë të këndojnë.

Shumë kisha gjermane janë rihapur të dielën në mëngjes pasi shumica e tyre qëndruan të mbyllura për më shumë se një muaj si pjesë e masave për luftimin e përhapjes së koronavirusit.

Katedralja e Këlnit, kisha më e madhe në Evropë dhe vendi më i vizituar në Gjermani, e ka planifikuar një ceremoni të veçantë për miqtë e kishës. Punëtorët, anëtarët e korit, lexuesit e teksteve dhe djemtë e altarit u ftuan në ceremoninë ku do të marrin pjesë vetëm 122 persona në objektin që normalisht i pret 20 mijë vizitorë në ditë.

Përpos respektimit të masave higjienike, njerëzit gjithashtu duhet ta mbajnë distancën sociale prej 1.5 metrave mes njëri-tjetrit. Për më tepër, të gjitha llojet e kontaktit fizik janë të ndaluara.

Kancelarja gjermane, Angela Merkel, njoftoi më herët gjatë kësaj jave se kishat, muzetë, kopshtet zoologjike dhe hapësirat e lojërave për fëmijë do të rihapen gradualisht, shkruan “Deutsche Welle”, transmeton Gazeta Express.