Drejtori ekzekutiv  i Institutit Epik, Demush Shasha,  në një përgjigje për “Front Online” i ka komentuar deklaratat  e Kryeministrit në largim, Ramush Haradinaj, i cili dje tha se liberalizimi i vizave mund të ndodhë me 1 nëntor të këtij viti.

I pyetur se sa ka gjasa që liberalizimi i vizave të ndodhë këtë viti , Shaha tha se  kjo është e pamundur pasi që kanë mbeurt edhe dy takime të Këshillit për Drejtësi dhe Punë të Brendshme të BE-së dhe në asnjërin nga këto dy takime nuk është në rend të ditës çështja e liberalizimit të vizave për Kosovën.

“Është po thuaj e pamundur që të këtë vendimmarrje pozitive për liberalizimin e vizave gjatë vitit 2019. Kanë mbetur edhe dy takime të Këshillit për Drejtësi dhe Punë të Brendshme të BE-së, në muajin tetor dhe dhjetor 2019. Në asnjërin nga këto takime, çështja e liberalizimit të vizave për Kosovën nuk është në rend dite. Rrjedhimisht i gjithë procesi i vendimmarrjes për liberalizimin e vizave pritet të shtyhet për vitin 2020”, Tha ai.

Ndërsa i pyetur se si i komenton deklaratat e kryeministrit në largim për çështjen e vizave, Shaha tha se premtimet për viza janë për konsum të brendshëm.

“Konsideroj se deklaratën e z. Haradinaj duhet parë në kontekstin e deklaratave të gjithë vitit 2018, me ç’rast janë bërë premtimet e pafund për liberalizimin e vizave por të cilat nuk u realizuan dhe në fakt kanë qenë deklaratat për konsum të brendshëm. Rrjedhimisht, edhe sot deklaratë e z. Haradinaj duhet parë nga ky këndvështrim” deklaroi Shasha./Front Online/