Kryeministri i Kosovës, Avdullah Hoti, para pak çastesh ka bërë të ditur masat e reja anti-COVID që do të aplikohen nga dita e premte(pasnesër), duke futur disa nga Komunat kryesore të vendit në karantinë si: Prishtina, Ferizaj, Gjilani, Peja, Podujeva, Mitrovica e Jugut, Fushë-Kosova, Obiliqi dhe Shtimja.
Në këto Komuna, të cilat kanë numrin më të madh të bizneseve në Kosovë, nga ora 19:00-05:00 do të mbyllet çdo aktivitet ekonomik dhe vendoset kufizim i plotë i lëvizjes qytetare, me ç’rast do të ketë orë policore dhe do të ndalohen hyrjet dalje.
Një vendim të tillë ekzekutivi i vendit e ka marrë, të cilin po e kundërshtojnë fuqishëm përfaqësuesit e bizeneve në Kosovë, në ditën kur në Kuvendin e Kosovës nuk ka kaluar Ligji për Rimëkëmbje Ekonomike.
Por, këto vendime të fundit pritet t’i japin edhe një goditje shtesë ekonomisë së Kosovës, të cilën, sipas statistikave të fundit të Fondit Monetar Ndërkombëtar (FMN) e ka bërë për “respirator” pandemia COVID-19.
Sipas FMN-së, deri në muajin e kaluar (tetor) GDP-ja e Kosovës ka shënuar rënie prej 7.5%, derisa vitin e kaluar rritja e GDP-së ishte 4%, raporton Front Online.
Rënie të GDP-së prej 7.5% ka shënuar edhe Shqipëria,
Pak më mirë se Kosova dhe Shqipëria i kanë punët Bosnja (-6,5%) dhe Maqedonia e Veriut
(-5.4%), por shumë më keq i ka punët Mali i Zi, ku rënia e GDP-së për këtë periudhë dhjetëmujore ka arritur në 12%.
Dukshëm më mirë punët se të gjitha vendet e rajonit i ka Serbia, ku rënia e GDP-së ka qenë 2.5%, apo trefish më mirë se Kosova dhe Shqipëria. (Front Online)
Pasojat e Covid-it në ekonomitë e rajonit:
Rënie e GDP-së( Tetor 2020)
Kosova -7.5%
Shqipëria -7.5%
Bosnja -6.5%
Maqedonia e Veriut -5.4%
Mali i Zi -12%
Serbia – 2.5%
Burimi: FMN
