Sipas të dhënave zyrtare, ekonomia e Indisë ka shënuar tkurrje prej 23.9 për qind gjatë periudhës prill – qershor. Kjo erdhi si pasojë e masave kufizuese kundër përhapjes së koronavirusit.
Kjo rënie ishte më e madhe sesa parashikimi prej 18.3 për qind, i bërë përmes një ankete të agjencisë Reuters. Në çerekun e parë të vitit, ekonomia e Indisë shënoi rritje prej 3.1 për qind.
India i ka raportuar 78,512 raste të reja të koronavirusit të hënën. Kjo është shifra më e lartë ditore në botë, por më e ulët se numri i shënuar një ditë më parë, që ishte rekord botëror.
Shteti me popullsinë e dytë më të madhe në botë i ka shënuar shifrat më të larta ditore të infektimeve që nga 7 gushti. Me gjithsej 3.62 milionë persona të infektuar, India po u afrohet shpejt Shteteve të Bashkuara dhe Brazilit, që kanë më së shumti raste në botë. Megjithatë, India ka shkallë më të ulët të vdekshmërisë.
Përpos infektimeve, gjatë 24 orëve të kaluara në Indi u regjistruan edhe 971 viktima të reja dhe shifra e përgjithshme e të vdekurve shkoi në 64,469, njoftoi Ministria e Shëndetësisë.
