Kryendeshja e sotme në Superligën e Kosovës u zhvillua në stadiumin “Rexhep Rexhepi” në Drenas.

Në ndeshjen e javës së 29-të, Ballkani e mundi Feronikelin si mysafir me rezultat të pastër, 0:2, shkruan FrontOnline.

Pas ndeshjes, trajneri i Feronikelit, Klodian Duro si gjithnjë ka vendosur t’i kritikojë gjyqtarët.

“Mendoj që kemi bërë një ndeshje të mirë, pavarësisht se kemi humbur nga kundërshtari i cili po lufton për titullin kampion dhe ka një skuadër të mirë. Sigurisht unë mendoj që në pjesën e parë na bllokuan më tepër, nuk them që janë gabime me dashje, por edhe gjyqtarët duhen të jenë më të përqendruar në lojë”, tha Duro në “Art Sport”.

“Nëse bllokohemi edhe nga faktorët tjerë është shumë e vështirë pastaj që të përballesh dhe të marrësh pikë. Ne jemi Feronikeli dhe nuk jemi klub i vogël. Djemtë dhanë gjithçka në fushën e lojës, nuk dua të flas më gjatë sepse kam edhe mendimet e mija për penalltinë e dhënë dhe disa raste tjera”, shtoi ai.

Pas ndeshjes është deklaruar kryetrajneri i suharekasve, Bledi Shkëmbi vlerësoi pikët e fituara, ndërkohë që u ankua edhe në rastet e humbura nga lojtarët e tij.

“Është e vërtetë që ishte një ndeshje e rëndësishme. Por, tre pikët janë më të rëndësishme. Ishte një kundërshtar i fortë, patëm raste të humbura, por në këto ndeshje, më të rëndësishme janë tre pikët. Lufta për objektivat që kemi bëhet shumë e vështirë”, ka thënë Shkëmbi./FrontOnline/