Inspektorati Policor i Kosovës është duke vazhduar hetimet për rastin e Drejtorit të Drejtorisë për Hetimin e Trafikimit me Qenie Njerëzore në Policinë e Kosovës, Riza Murati, i cili po dyshohet se ka ushtruar dhunë fizike ndaj bashkëshortes së tij për çka po hetohet për veprën penale “Dhunë në familje”.

Në mars të këtij viti, në Policinë e Kosovës është dënoncuar rasti për “dhunë në familje” nga bashkëshotja e tij. Pas hetimeve, ndaj drejtorit, Riza Murati gjykata ka lëshuar një urdhër mbrojtës si masë mbrojtje ndaj viktimës- bashkëshortes së Riza Muratit.

Rasti është duke u hetuar edhe nga IPK. Në një përgjigje për Insajderin, IPK tregon se janë duke bashkëpunuar me Prokurorinë Themelore të Mitrovicës për veprimet hetimore. Por, ende nuk është vënë ndonje mas ndaj tij.

“Inspektorati Policor i Kosovës ka ndërmarrë disa veprime hetimore lidhur me rastin në fjalë dhe ka komunikim të vazhdueshëm me Prokurorinë Themelore në Mitrovicë të cilës i janë përcjellë raporte/ deklarata lidhur me këto veprime hetimore. IPK në kuadër të veprimeve hetimore, sipas procedurave të parapara ka njoftuar edhe Mbrojtësin e Viktimave të cilët kanë parashtruar kërkesën për Urdhër Mbrojtës në gjykatën kompetente”, thuhet në përgjigjen e tyre.

Gjykata Themelore në Prishtinë ka lëshuar një Urdhër Mbrojtës ndaj të dyshuarit për ‘dhunë në familje’ Riza Murati. IPK thotë se urdhëri është duke u implementuar.

“IPK është e njoftuar lidhur me Urdhrin Mbrojtës nga Gjykata Themelore në Prishtine dhe se ky urdhër është duke u duke u implementuar institucioni përgjegjës. Lidhur me veprimet e mëtutjeshme hetimore, hetuesit e IPK-së janë në pritje të autorizimeve tjera nga Prokuroria Themelore në Mitrovicë”, thuhet në përgjigje./Insajderi.org